DILI, 16 Jullu 2025 (TATOLI) – Kompañia Milleniun Green Agro (MGA), Lda, kada tinan halo viveiru ba ai-oan tipu haat hodi fa’an no distribui ba komunidade hodi kuda.
Jerente MGA, Manuel Nazareth, hateten viveiru ba tipu ai-oan ne’ebé sira fa’an mak hanesan ai-oan sira ne’ebé iha valór ekonomia, floresta, protesaun no indústria, sabraka, avokate, bua naga, haas, rambutan ai-kameli, kakau, ai-kameli, ai-kakeu, ai-kafé, mahoni no seluk tan.
MGA eziste iha 2015, halo viveru ba ai-oan sira fa’an ba Organizasaun Naun Governamentál no ajénsia internasionál, bainhira implementa projetu ruma relasiona kuda ai-oan maibé bainhira fa’an la hotu kompañia rasik fahe gratuita ba komunidade no NGO sira ne’ebé presiza kuda.
“Kada tinan ami halo viveru ai-oan hamutuk rihun 200 to’o 300, ami-nia kompañia ne’e reprezentante kada munisípiu iha hotu entaun ema presiza hola ai-oan karik la presiza to’o mai Dili maibé sosa iha munisípiu de’it,” Manuel Nazareth ba Tatoli, iha Timor Plaza, bainhira partisipa espozisaun ne’ebé Ministériu Agrikultura, Pekuária, Peska no Floresta MAPPF realiza iha Timor Plaza.
Nia esplika, durante ne’e Ajénsia Internasionál sira ne’ebé sempre sosa mak TOMAK, Mercy Corps, SAPIP no seluk tan.
“Ami mós halo grafting ba ai-oan balu hanesan sabraka, haas ne’ebé tinan ida ka rua bele fuan, ai-oan sira-ne’ebé ami fa’an depende ba nia altura no boot, folin hahú husi $2 to’o $30,” nia dehan.
Aleinde ne’e MAG rasik mós serbisu hamutuk ho Sekretaria Estadu Formasaun Profesionál no Empregu (SEFOPE), liuhusi sentru formasaun Tibar no Ministériu Agrikultura, Pekuária, Peska no Floresta (MAPPF) liuhusi Eskola Tékniku Vokasionál Agrikultura lori sira-nia estudante no joven ba MAG nia fatin tuir formasaun oinsá kuda ai-oan, halo viveiru no seluk tan.
Tuir nia, atividade ne’ebé sira halo importante tebes tanba aleinde buka lukru maibé mós sai fatin oportunidade ba joven sira aprende. Nafatin fó oportunidade ba joven sira-ne’ebé hakarak apreende MAG prontu fasilita fó formasaun.
“Atividade ne’ebé ami halo, ida-ne’e ami rasik mak harii, tanba antes ne’e apreende esperiénsia husi Gesellschaft für Internationale Zusammenarbeit (GIZ) entaun matenek ne’ebé ita hetan bainhira organizasaun termina nia projetu matenek ne’ebé ita hetan bele aplika fali iha ita-nia rai,” konklui.
Jornalista: Arminda Fonseca
Editór: Evaristo Soares Martins
