DILI, 17 Jullu 2025 (TATOLI)—Diretór Ezekutivu Fundu Dezenvolvimentu Kapitál Umanu (FDCH, sigla portugés), Júlio Aparício, garante katak bolseiru ne’ebé ramata estudu iha rai-li’ur sei kolokadu ba serbisu tuir área formasaun iha ministériu no instituisaun Estadu sira.
“Ita garante estudante sira ne’e bainhira fila mai serbisu, hahú ha’u-nia mandatu iha IX Governu aplika ida-ne’e. La’ós ita gasta tiha osan ba sira depois serbisu iha fali fatin seluk,” Diretór Ezekutivu hato’o ba Ajénsia TATOLI, iha ninia knaar fatin, Kolmera, Kinta ne’e.
Nia dehan, bolseiru sira ne’ebé foti estudu iha área enfermajen, médiku, no saúde seluk tenke serbisu iha Ministériu Saúde.
“Problema la’ós ba ami FDCH maibé ba ministériu hotu-hotu. Ida-ne’e depende ba ministériu ida-idak. Ami-nia planu ba bolseiru sira bainhira ramata fila mai serbisu, ami koordena ona ho liña ministeriál,” nia akresenta.
Notísia relevante : FDCH planeia tinan oin haruka tan bolseiru na’in-30 ba ATMI
Dahuluk mak instituisaun Estadu ne’ebé haruka hamutuk ho FDCH no bolseiru tenke asina akodu nune’e bainhira fila sira bele iha kolokasaun ona.
“Ita haruka ema eskola maibé instituisaun balun tenke fó kontratu ba sira, entaun bainhira halo tiha kontratu, ezemplu ami ho ANATL asina akordu iha tinan 2024, haruka 35 ba estudu iha Palembang, Jakarta. Ida-ne’e ita halo kontratu entre parte tolu. Entaun bainhira ramata estudu fila mai Timor-Leste, sira halimar de’it fulan-ida no tenke ba serbisu ba ANATL. Ida-ne’e ita halo durante mandatu IX Governu nian,” nia esplika.
Nune’e mós, Ministériu Finansa haruka estudante 46 bá eskola iha rai-li’ur, bainhira fila mai serbisu iha ministériu ne’e rasik.
FDCH kompostu husi Prezidente Konsellu Administrativu, Ministru Gastão de Sousa, ho nia membru sira hanesan Ministru Justisa, Ministru Ensinu Superiór Siénsia no Kultura, Ministru Petróleu no Rekursu Minerál, Ministra Finansa no Sekretáriu Estadu Formasaun Profisionál no Empregu.
“Ami serbisu hamutuk di’ak tebes no ami prevene atu estudante sira labele tun-sae, entaun ami koordena hodi aplika no implementa ida-ne’e iha bolsa estudu ne’ebé fó ba estudante sira,” nia katak.
FDCH hahú tinan 2011 to’o 2024, rejista ona bolseiru ne’ebé gradua hamutuk 6.000.
Jornalista : Osória Marques
Editora : Julia Chatarina
