DILI, 22 Jullu 2025 (TATOLI) – Prezidente Federasaun Karate husi Saun Tomé no Prínsipe, Oldayr Neto, deskreve Jogu Komunidade Nasaun Ko’alia Lian Portugés (CPLP) Edisaun da-12, ne’ebé tinan ne’e Timor-Leste mak sai uma-na’in, nu’udar oportunidade atu partilla amizade, esperiénsia no espíritu kompetisaun saudavel entre país irmaun.
“Jogu ida-ne’e hanesan momentu festivu, patilla ideia, ba irmaun CPLP. No mós promove nivel kompetitivu. Saun Tome no Prinsípe partisipa ho forma posivel”, nia dehan ba Tatoli iha Sentru Konvensaun Dili, ohin.
Delegasaun husi Saun Tome e Prínsipe komposta husi atleta karate-do na’in-12, ne’ebé sei kompete iha kategória pezu kilógrama (kg) -55 no -60 kg. “Ami-nia ekipa preparada no iha esperansa ba jogu atu manán”, nia afirma ho otimista.
Sekretáriu Tékniku Modalidade Karate husi Mosambike, Eduardo Mabote, informa katak husi nia país iha alteta na’in-rua, feto no mane ida, mak sei kompete iha karate-do iha kategoria -48 kg no -55 kg.
Nia salienta atleta sira ne’e preparadu ein termu tékniku, tátiku no mentál no hein atu tun ba kampu batalla. “Ami-nia esperansa mak lori medalla bá uma Mosambíke”, nia hateten.
País sira ne’ebé konfirmadu atu kompete iha modalidade karete-do mak Portugál, Mosambike, Saun Tomé, Kabuverde, Angola no Timor-Leste.
Tuir órariu jogu ba modalidade ne’e sei hala’o iha loron 24-25 Jullu tinan ne’e.
Notísia relevante: Atleta na’in-20 husi nasaun CPLP mak kompete iha modalidade Karate-do
Jornalista: Nelson de Sousa
Editora: Maria Auxiliadora
