DILI, 24 Jullu 2025 (TATOLI)-Atleta timoroan Eugénio da C. Wondeng Soares halakon jogadór husi nasaun tolu no kontinua ba finál kompetisaun jogu ho modalidade Karaté-do.
Iha jogu ne’e, Eugénio manán hasoru nia adversáriu husi Angola (9-2), Saun Tomé no Prinsípe (8-0) no Portugál (7-6). Enkuantu Kabuverde la marka prezensa.
Tanba hetan vitória iha kompetisaun ne’e maka atleta timoroan ne’e sei kontra portugés Luís António Morais iha finál modalidade Karaté-do maskulinu, iha kategoria kilógrama (kg) 60, iha Jogu Desportivu Komunidade Nasaun Ko’alia Lian Portugés (CPLP-sigla portugeza) ba da- 12, ne’ebé hala’o iha Dili.
Luís Morais manán Kabuverde (11-2), Saun Tomé no Prinsípe (9-1), Angola (5-2) no lakon ho Timor-Leste (6-7).
“Sente orgullu tebes tama finál. Sei hasoru filafali ho Portugál”, Eugénio Soares hateten ba Tatoli iha Jinájiu Dili, ohin.
Nia kompromete sei esforsa an liután iha jogu finál hodi hetan medalla osan-mean. “Sei esforsu iha finál no sai orgullu ida”, nia dehan.
Treinadór modalidade Karaté-do husi Timor-Leste, Andreas da Silva Ailerbito Quef, sente kontente ho dezempeñu atleta nasionál nian, tanba durante ne’e sira preparadu, mezmu iha difikuldade uitoan iha tékniku, nune’e sei hadi’ak liután estratéjia, tékniku no velosidade iha jogu finál.
“Hanesan treinadór tau esperansa boot ba atleta. Depende atleta nia esforsu. Se nia esforsu ohin hodi hetan rezultadu hanesan ne’e, aban ami tenke hadi’ak tan estratéjia, oinsá atu hasoru [atleta seluk tanba] sira mós joga di’ak, maibé lakon”, nia kompromete.
Iha sorin seluk, atelta portugés Luís António Morais kontente no sei hatudu jogu di’ak liután kontra Timor-Leste. “Iha esperansa hetan vitória”, nia otimista.
Kompetisaun maskulinu iha modalidade Karaté-do, iha kategória pezu 60kg ne’e partisipa husi atleta Eugénio da C. Wondeng Soares (Timor-Leste), Patrício Nkruma Samba Neto (Angola), Miguel Cabral Martins (Kabuverde), Luís Antonio Morais (Portugál) no Morgan Monteiro de Ceita do Espírito Santo (Saun Tomé no Prínsipe).
Notísia relevante: Timor-Leste no Angola sei hadau medalla osan-mean iha Karate-do 55kg
Jornalista: Nelson de Sousa
Editora: Maria Auxiliadora
