DILI, 14 Agostu 2025 (TATOLI) – Empreza petrolífera Santos informa ona ba Ministériu Petróleu no Rekursu Minerál (MPRM) katak halo hela prosesu venda ba ativu ka asset iha kampu Bayu Undan ba empreza Abu Dhabi National Oil Company (ADNOC), husi Emiradu Árabe Unidu (EAU).
“Informasaun ne’ebé ita rona, sira atu fa’an sira-nia asset ba kompañia konsórsiu husi Médiu Oriente. Ita la hatene detallu ne’e oinsá, maibé Santos rasik mai informa ba ami, ADNOC hakarak atu hola asset ka ativu hothotu ne’ebé Santos iha”, Francisco Monteiro hateten ohin.
Nia esplika katak, bainhira empreza ADNOC sosa hotu asoens husi Santos, siginifika projetu sira ne’ebé relasionadu, inklui kampu Bayu Undan no prosesu decommissioning ka dezmantelamentu nian mak la’o duni maka sei pasa hotu ba konsórsiu foun ADNOC nian.
“Forma detalle bilaterál [tranzasaun] sira-nian la’o oinsá ita la hatene, maibé ne’e implika katak, aban bainrua ita avansa duni ho dezmantelamentu [Bayu Undan], karik ne’e la investe husi Santos, maibé sai fali husi kompañia foun ne’e. Nia sei laiha impaktu maka’as ba ita, nia viabilidade sira ne’e sei pasa hotu ba kompañia [ADNOC] hola ne’e”, ministru salienta.
Kona-ba ba ekipamentu sira instala iha Bayu Undan, hirak ne’ebé aban bainrua identifikadu la nesesáriu uza ba projetu kontinuasaun produsaun ba prosesamentu Kaptura no Armazenamentu Karbonu (CCS, iha inglés) sei dezmantela. Ba ida ne’ebé nia valór tékniku no sientífiku sei konserva no entrega ba instituisaun sira hanesan amostra, no sira ne’ebé presiza tesi rahun tiha mak sei halo iha Tíbar.
Tuir informasaun ne’ebé Tatoli asesu husi www.reuters.com, iha loron segunda-feira, 16 Juñu 2025, produtór gás daruak boot liu iha Austrália, Santos (STO.AX), sira-nia parte loke oportunidade foun intensaun atu apoia negosiasaun kona-ba ba akizisaun ativu ka asset nian husi ADNOC ho valór billaun $18,7 ne’ebé hakarak haburas negósiu gás globál nian.
ADNOC nia brasu investimentu XRG ho Abu Dhabi Development Holding Company (ADQ) no empreza kapitál privadu Carlyle propoin atu oferese $5.76 (A$8.89) kada asaun Santos nian. Asaun ne’e troka ikus liu iha A$7.72.
Hodi konsidera dívida líkidu, akordu ne’e fó ba Santos valór emprezariál ida ho dolár australianu billaun $36,4, ne’ebé sei halo ida-ne’e sai hanesan sosa korporativu boot liu iha istória Austrália nian, tuir dadus FactSet nian.
Negosiasaun sosa ne’e mosu bainhira folin mina no gás nian atinje aas liu iha semana barak nia-laran bainhira Izraél no Iraun troka atake aéreu sira, hamosu preokupasaun katak esportasaun mina no gás nian husi Médiu Oriente bele hetan interrupsaun maka’as.
Ho Santos iha nia liman, konsórsiu ne’ebé lidera husi XRG sei hetan kontrolu ba operasaun rua gás naturál likidu australianu nian – Gladstone LNG no Darwin LNG, nomós partisipasaun sira iha PNG LNG no Papua LNG ne’ebé seidauk dezenvolve. Santos nia interese sira iha Papua-Nova Giné konsidera hanesan nia ativu sira ne’ebé folin liu.
Kompañia ne’e mós dezenvolve hela projetu petrolíferu ida iha Alaska, Pikka, ne’ebé sei hahú prodús iha meadu 2026.
Notisía relevante: Governu no Santos diskute futuru Bayu Undan no Projetu Armazenamentu Karbonu
Jornalista: Arminda Fonseca
Editora: Maria Auxiliadora
