BOBONARU, 15 Agostu 2025 (TATOLI)–Ekipa Task-Forse Mitigasaun surtu Raiva, kompostu husi Ministériu Saúde, Ministériu Agrikultura, Pekuária, Peska no Floresta, hamutuk ho Autoridade Munisipál Bobonaru, Sesta ne’e, realiza vasina masal ba ema no animál iha Suku Saburai, Postu Administrativu Maliana, Munisípiu Bobonaru atu prevene tranzmisaun virus referidu.
Pontu Vokál Ekipa Traballu Prevensaun Surtu Raiva, Munisípiu Bobonaru, Paulina Pereira esplika vasinasaun tama-sai uma ne’e realiza dahuluk iha Suku Saburai tanba konsidera área afetada.
“Razaun ida halo vasinasaun masal iha Suku Saburai, tanba foin lalais joven-feto ida mate tanba Raiva iha suku ne’e. Depoiz asu ida tata nia ne’e mós halai lakon no hela besik fronteira ne’ebé vírus ne’e fásil atu da’et,” nia informa ba jornalista sira iha Saburai.
Paulina hatutan atividade ne’e kontinua iha Suku Holsa no Postu Administrativu Atabae tanba área afetada.
Notísia relevante: Suku 18 iha Postu Bobonaru risku ba tranzmisaun virus Raiva
Iha fatin hanesan, Koordenadór Pilar I Ekipa Task-Forse Prevensaun Raiva, Postu Administrativu Maliana, Augusto Caetano louva komunidade haki’ak-na’in sira hahú ferik-katuas, joven no labarik sira koopera di’ak tebes ho ekipa traballu.
“Sira maioria kolabora. Sira na’in kaer sira-nia asu, sira hamaus, balun sira sulan ba iha uma-laran. Ekipa to’o mak sira hasai simu vasina. Iha balun, ida-rua, mak ladún koopera tanba hela iha ninin liu la rona sosializasaun husi delegadu, xefe aldeia no xefe suku sira,” nia haktuir.
Aleinde ne’e, Xefe Suku Saburai, Abel Manu Mali konsidera intervensaun ne’e vantajen boot tebes tanba liuhusi intervensaun ekipa task-force bele ajuda ona komunidade atu hamutuk atu hapara liña tranzmisaun vírus Raiva ba ema no animál sira seluk,” Abel tenik.
Enkuantu, iha atividade vasinasaun masal ne’e ekipa task-force konsege vasina asu hamutuk 200, lekirauk ida, busa 1 no ema na’in-ualu.
Jornalista: Sergio da Cruz
Editór: Xisto Freitas da Piedade
