DILI, 16 Agostu 2025 (TATOLI) – Progresu konstrusaun sistema irrigasaun Galata ne’ebé lokaliza iha suku Uatuhako, postu administrativu Venilale, sei finaliza iha fulan-Outubru, tinan ne’e tanba atinje ona 95%.
Ministru Agrikultura, Pekuária, Peska no Floresta (MAPPF), Marcos da Cruz, dehan irrigasaun iha munisípiu Baukau ne’ebé iha ona faze konstrusaun mak Galata no ohin Governu lansa tan projetu irrigasaun Modobuti ne’ebé lokaliza iha postu administrativu Venilale.
“Tarde liu [irrigasaun Galata] sei inaugura iha Outubru, ne’ebé sei fornese bee ba natar iha área Venilale no Ossú”, Marcos da Cruz hateten iha ámbitu lansamentu fatuk dahuluk ba irrigasaun Modobuti, iha aldeia Uatua, ohin.
Governante ne’e relata mós projetu konstrusaun irrigasaun rua – iha Laivai ne’ebé atinje ona pursentu 95 no tuir planu sei finaliza mós iha Outubru no seluk iha Maliana II, ne’ebé foin atinje porsentu 15.
Aleinde ne’e, Governu mós planeia atu konstrui tan irrigasaun lima seluk hanesan Fatumeta ne’ebé lokaliza iha postu Vemase-Baukau, Irrabere-Vikeke, Maukolo-Zumalai, Betanu-Manufahi, no Laklo-Manatutu ne’ebe sei lansa fatuk dahuluk iha tinan ne’e.
“Irrigasaun mak fatór ida atu aumenta produsaun”, Marcos akresenta.
Lembra katak irrigasaun Galata hahú konstrusaun iha 2023 husi empreza internasionál China Civil Engineering Construction Corporation ho valór orsamentu millaun $14. Irrigasaun ne’e sei fornese bee ba natar ektare 600 no benefisia uma-kain 750 husi postu administrativu Venilale-Baukau no postu Ossú-Vikeke.
Notísia relevante: Komisaun D nota konstrusaun irrigasaun Galata iha Baukau bele ramata tinan ne’e
Jornalista: Natalino Belo
Editora: Maria Auxiliadora
