DILI, 06 Marsu 2025 (TATOLI)–Komisaun D iha Parlamentu Nasionál (PN) ne’ebé trata asuntu Ekonomia no Dezenvolvimentu foin lalais ne’e halo fiskalizasaun hodi haree direta konstrusaun fíziku ba irrigasaun Galata iha aldeia Liabala, suku Uatohaku, postu administrativu Venilal, munisípiu Baukau.
“Haree direta irrigasaun ne’ebé mak Governu halo konstrusaun iha Galata, atinje 85 % ka 89% no iha tinan ne’e bele ramata konstrusaun,” Vise-Prezidente Komisaun D, Manuel Hendrique Noronha, informa ba jornalista sira, iha resintu PN, kinta ne’e.
Nia dehan, irrigasaun ne’e sei fornese bee ba povu agrikultór sira-nia natar ektare 611 iha postu haat iha munisípiu Baukau no Vikeke. Maski irrigasaun ne’e ninia konstrusaun seidauk ramata maibé hahú fornese ona bee ba povu agrikultór sira-nia natar iha área Galata no Waibobo.
“Implementasaun projetu ne’e la’o tarde tanba antes ne’e iha problema rai ho komunidade, maibé Governu ho autoridade munisípiu halo koordenasaun no ikus mai bele solusiona. Agora projetu ne’e la’o di’ak, ita garante projetu ne’e bele iha kualidade di’ak no tempu badak bele hotu,” nia akresenta.
Notísia relevante : Komunidade labele impede konstrusaun ba irrigasaun Galata – Ministru MAPPF
Iha fatin hanesan, Deputadu Bankada Governu husi Partidu Demokrátiku (PD) haktuir, durante halo fiskalizasaun konsege identifika problema.
“Dahuluk komunidade seidauk tau interrese ba irrigasaun tanba iha kanu boot ne’ebé fornese bee husi irrigasaun, abitante lokál balun tesi tiha fiu ne’ebé kesi junta ba paralon boot. Problema ida tan mak Ministériu Agrikultura presiza hato’o ba kompañia tenke liga ho floresta kuda ai ho du’ut ne’ebé bele salva rai iha ne’ebá, tanba rai ne’e kondisaun ladún di’ak bainhira udan boot rai monu, entaun presiza protesaun kuda ai-horis,” nia tenik.
Aleinde ne’e, presiza halo morru protesaun ba área ne’ebé ameasadu tanba iha rai lolon ho kondisaun rai dodok bainhira udan boot rai bele monu, entaun presiza proteje irrigasaun referidu.Konstrusaun irrigasaun Galata finansia husi Orsamentu Jerál Estadu (OJE) ho kustu millaun $14 ne’ebé prevee husi Fundu Infraestrutura.
Jornalista : Nelson de Sousa
Editora : Julia Chatarina
