OEKUSI, 18 Agostu 2025 (TATOLI) – Xefe Sentru Saúde Komunitáriu Oésilo iha Rejiaun Administrativa Espesiál Oekusi Ambeno (RAEOA), Fridos Elo, rekomenda ba Ministériu Saúde atu hadi’a eskalaun ba profisionál saúde sira no aumenta médiku no parteira, hodi haforsa prestasaun serbisu iha sentru saúde no postu saúde sira.
Fridos Elo, relata nia rekomendasaun ne’e, iha ámbitu enkontru ofisiál ho Vise-Ministru ba Fortalesimentu Institusionál Saúde, José dos Reis Magno, iha Sentru Saúde komunitáriu Oésilo, foin lalais ne’e.
“Ami hanesan funsionáriu públiku, dezde uluk kedas to’o agora, ami sente ladun di’ak iha tratamentu, tanba ami-nia dever barakliu kompara ho ami-nia direitu, ladun balansu, entaun liuhusi enkontru ofisiál ne’e ami rekomenda ba oin bele tau konsiderasaun, tanba ami serbisu inisíu iha 2004 to’o agora ami-nia eskalaun laiha mudansa,” nia dehan iha enkontru ne’ebé partisipa mós husi Sekretáriu Rejionál ba Asuntu Saúde, Luís de Jesus Neno no Diretora Jerál Kuidadu Saúde Primaria, Elizabet Leto Mau.
Preokupasaun daruak iha Sentru Saúde Oésilo ne’ebé enfrenta mak, menus rekursu umanu, médiku no parteira, tanba Sentru Saúde Oésilo iha postu saúde tolu, kada postu médiku ida de’it, só postu saúde Tumin mak iha na’in-rua, ba postu saúde Níbin no Pune mak to’o agora seidauk iha, no Sentru Saúde Oésilo mós iha parteira rua de’it.
“Ne’ebé kuandu ida moras, ida lisensa maternidade ka lisensa anuál, entaun preokupa tebes kuandu profisionál ida de’it la tuun atu foravél ho nia serbisu, liuliu atu atende ho kalan entaun iha loron, ema ida tenke troka fali,” nia katak.
Nia informa, iha postu saúde Nibin iha profisionál ida de’it, loloos ema na’in-rua, iha postu saúde Tumin sufisiénte ona, tanba parteira na’in-rua médiku no infermeira na’in-rua no postu saúde Pune parteira ida de’it ho médiku.
Maibé nia mós agradese ba polítika Autoridade RAEOA, tanba tinan ne’e estabelese postu atendimentu saúde 12 ba bairru izoladu sira, inklui Sentru Saúde Oésilo hetan fatin tolu mak fatin tratamentu iha Lil-as no Hau-Ana pertensia ba suku Usitasa’e no fatin tratamentu iha aldeia Nonquikan suku Bobometo.
Notísia relevante:Hakbesik atendimentu saúde ba komunidade, MS lansa programa PIS iha suku Cunha
Vise-Ministru ba Fortalesimentu Institusionál Saúde, José dos Reis Magno, rekoñese no Governu sei rezolve ho fazeadamente tanba preokupasuan ne’e la’ós iha Oekusi maibé munisipíu seluk mós akontese, importante mak fó tratamentu dignu ba povu.
“Kona-ba sira-nia eskalaun ka grau, sua eselénsia Ministra haree hela asuntu ne’e, tanba tinan barak ona profisionál saúde ne’ebé funsionariu públiku barak, loloos sira tenke hetan ona direitu ida-ne’e, ne’ebé rekomendasaun sira ne’e la sala, maibé pasiénte hodi hein, tinan oi nou tinan tuir mai bele rezolve ona, ba rekursu umanu nian, ha’u hanoin autoridade RAEOA mós presiza haree importante mak tenki fó tratamentu ba povu ho dignu, Governu sei haree no sei rezolve fazeadamente, tanba dignidade ema nian la sukat de’it ho osan maibé sukat mós ita nia karreira ne’ebé fó ba povu sira,” ia hateten.
Notísia relevante:Vise-Ministru Saúde rekomenda tau atensaun ba fasilidade iha ospitál Oekusi
Entretantu, iha Sentru Saúde Komunitária Oésilo fó tratamentu saúde ba populasaun suku tolu mak Usitaqueno, Bobometo no suku Usitasae ho nia aldeia hamutuk 13 ho fasilidade sira mak postu saúde tolu no fatin tratamentu iha bairru izoladu tolu.
Jornalista: Abílio Elo Nini
Editór: Rafael Ximenes de A. Belo
