DILI, 21 Agostu 2025 (TATOLI)-Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál Domingos Raul Falur Rate Laek, hetan vizita husi nia omologu Brunei Darussalam, Majór Jenerál Muhammad Haszaimi Bin Bo Hassan, hodi hametin kooperasaun iha área defeza.
“Agora ita-hetan ona oportunidade, ita-nia militár balun ba tuir semináriu iha ne’ebá, liuliu kona-ba industrializasaun defeza nian, ne’ebé agora daudaun ne’e ita iha tendénsia para servisu hamutuk”, Tenente Jenerál Falur hatene jornalista sira iha knaar fatin Kuartél Jenerál Fatuhada, kinta-ne’e.
Nia hatutan vizita kortezia ne’e hanesan lasu amizade entre nasaun-rua iha área Defeza nian. “Vizita ne’e konversa uitoan kona-ba vizita liurai Brunei Darusalam iha fulan hirak liubá, inklui vizita Prezidente Repúblika, José Ramos-Horta, bá Nasaun Brunei. Ha’u mós hetan ona konvite dala-hira ba vizita iha tinan kotuk liubá no ohin sira mai vizita fali ita-nia forsa”.
Tuir Falur vizita husi Xefe Estadu Maiór Jenerál Forsa Armada Brunei ne’e hodi partisipa eventu loron FALINTIL ba dala-50, komemorasaun ne’e sai hanesan oportunidade hodi fahe esperiénsia ba malu ligadu ho dezenvolvimentu forsa entre nasaun rua nian.
Notísia relevante: Timor-Leste preparadu hametin kooperasaun militár ho Brunei Darussalam
Jornalista : Natalino Costa
Editora : Rita Almeida
