DILI, 01 Setembru 2025 (TATOLI)—Governu liuhusi Ministériu Administrasaun Estatál (MAE), Segunda ne’e, fó pose ba Prezidente Autoridade Munisípiu (PAM) Dili, Fransisco dos Santos no PAM Bobonaru, Paulo Moniz Maia.
Ministru Administrasaun Estatál, Tomás do Rosário Cabral, hateten, Prezidente Autoridade hala’o funsaun reprezenta Governu sentrál iha área administrasaun iha munisípiu atu organiza, koordena no mantein orden serbisu bele la’o ba oin.
“Prezidente autoridade ninia subordinadu mak ema ne’ebé serbisu ba nia autoridade postu administrativu sira. Se imi la halo lasu ne’ebé mak di’ak, laiha koordenasaun ne’ebé mak di’ak, mak administrasaun sei la la’o bá oin,” Ministru Cabral hato’o ba Jornalista sira iha resintu edifísiu MAE, Kaikoli.
Notísia relevante : PAM Bobonaru klarifika suspensaun provizóriu ba nia knaar
Governante ne’e dehan, iha tranzisaun Governu lokál foun ida, husu ba munisípiu sira, liuliu ba PAM Dili no Bobonaru, iha área fronteira atu halo avaliasaun, pronúnsia serbisu, no preparadu ba munisípiu ka lae. “Tanba Primeiru-Ministru orienta atu organiza ita-boot sira iha administrasaun lokál.”
Nune’e, Ministru husu ba Prezidente Autoridade rua atu kumpre no obedese ba desizaun leten nian.
“Ohin iha juramentu dehan, ami sei firme hodi halo tuir buat ne’ebé iha, ami sei leál ba hotu no ami sei la mete ba grupu. Entaun, tenke serví povu ne’ebé fó orden ba administrasaun lokál,” nia katak.
Governante ne’e hameno ba PAM na’in rua atu konsolida-an no serbisu hamutuk ho autoridade sira atubele hetan rezultadu di’ak.
Iha fatin hanesan, PAM foun Bobonaru, Paul Moniz Maia hateten, hanesan sidadaun Timoroan no Bobonaruoan, nia sei kontinua serbisu ne’ebé mak PAM sesante sira husik to’o ohin loron.
“Ha’u sei kontinua serbisu balun husi Prezidente sesante sira, buat ne’ebé di’ak ha’u sei kontinua, ladi’ak ha’u sei muda, sei ladi’ak liu ha’u sei troka,” PAM Bobonaru katak.
Notísia relevante : Nomeiasaun Fransisco dos Santos nu’udar PAM Dili hein publikasaun
Nia kompromete, sei haree ba povu nia moris di’ak hanesan infraestrutura bázika ba estrada no dezenvolve área potensiál hanesan agrikultura.
“Povu nia moris di’ak mak infraestrutura bázika, tanba ema hotu hatene Bobonaru nia área potensiál boot mak agrikultura nian. Entaun, ha’u sei enkoraja no fó motivasaun di’ak ba komunidade hodi serbisu maka’as liután iha área agrikultura. Antes agrikultura la’o di’ak mak estrada tenke diak,” nia hato’o.
Nune’e mós, PAM Dili, Francisco dos Santos, hateten, nia parte sei foku ba problema hirak ne’ebé durante ne’e Dili enfrenta hanesan inundasaun no lixu iha kapitál.
“Problema barak sai kauza ba problema ida-ne’e hahú husi númeru veíkulu ne’ebé aumenta ba beibeik. Ha’u simu pozisaun ida-ne’e, ha’u sei serbisu hamutuk ho entidade sira hodi rezolve engrafamentu liuhusi ita haree parrajen karreta sira nian vertikál,” nia hato’o.
Antigu PAM Dili, Gregório Saldanha, simu pose iha 01 Marsu iha 2024 no hatama karta rejigna-an iha loron 28 Janeiru 2025, nune’e atuál Diretór Jerál Desentralizasaun no Governu Lokál, António Agosto Guterres mak asume PAM interinu Dili to’o agora.
Enkuantu, PAM Bobonaru, Alexandrino Pires, simu pose iha loron 06 marsu 2024 no iha loron 05 Juñu 2025, hetan suspensaun hosi Ministru Administrasaun Estatál, Tomás do Rosário Cabral no nomeia fali Celestino Marques sai Koordenadór Autoridade Munisípiu Bobonaru hodi jere administrasaun Bobonaru durante fulan-tolu, hahú Juñu to’o Agostu.
Jornalista : Osória Marques
Editora : Julia Chatarina
