DILI, 02 Setembru 2025 (TATOLI)— Sekretaria Estadu ba Igualdade (SEI) kontinua nafatin fasilita formasaun ba entidade mídia sira hodi bele sensível iha publikasaun notísia.
“Sekretaria Estadu Igualdade iha atividade regulár hamutuk ho jornalista sira, nu’udar parte ida husi Komisaun Igualdade hodi garante mídia sira sensível ba publikasaun, iha notísia sira no jornalista sira bele hatene oinsá sensível liután iha nia serbisu fatin, hakerek notísia, públiksaun notísia sira. Ida-ne’e ami halo la’ós de’it ba mídia imprime, maibé ba mós Rádiu Komunidade no media online sira,” Sekretária Estadu ba Igualdade, Elvina Sousa Carvalho hateten ba jornalista sira, iha salaun Maria Gorete SEI, Kaikoli, Tersa ne’e.
Notísia relevante : BELUN fasilita formasaun igualdade bazea ba jéneru iha Maliana
Nia dehan, SEI iha ona planu, ba oin sei iha tan formasaun iha promosaun igualdade ba jornalista sira.
“Ha’u konvida ita-boot sira no kolega Jornalista sira ne’ebé mak seidauk tuir formasaun, ha’u hanoin ita-boot sira bele joint para bele kontribui ba notísia ne’ebé mak sensível, notísia ne’ebé mak kontribui ba promosaun igualdade,” nia akresenta.
Programa husi SEI ne’e rutina ba mídia imprime, Rádiu Komunidade no mídia online sira. Iha 2026 SEI sei buka tan mídia sira hodi kontinua formasaun.
Jornalista : Osória Marques
Editora : Julia Chatarina
