DILI, 15 Setembru 2025 (TATOLI) – Inísiu fulan-Outubru, Governu sei lansa fatuk da-uluk ba konstrusaun estrada Lautein ba Com no Lautém ba Lospalos.
Pezidente Autoridade Munisípiu Lautem (PAM), Lautein, Melio de Jesus, hateten tuir loloos lansamentu fatuk dahuluk ne’e iha fulan-Setembru ida-ne’e nia laran, maibé tanba Primeiru Ministru Kay Rala Xanana Gusmão, sei halo vizita ofisiál ba iha Reinu Unidu entaun muda ba iha fulan-Outubru.
“Tuir komunikasaun ne’ebé Ministru Obra Públikas informa mai ha’u katak tuir loloos ita halo lansamentu ba fatuk dahuluk ne’e iha fulan-Setembru ne’e nia-laran, maibé tanba Primeiru Ministru Kay Rala Xanana Gusmão nia tempu iha so depoiz vizita ofisiál ba iha estranjeiru fila mai mak foin bele halo lansamentu. Tanba Primeiru Ministru mak sei halo lansamentu. Nune’e MOP informa mai ha’u katak nia kontaktu ona ho Primeiru Ministru katak exelénsia nia tempu só iha loron 2 ka 3 Outubru, tanba ne’e mak ita hein de’it katak prosesu lansamentu fatuk dahuluk ne’e sei iha data referida,” PAM Lautein, iha Salaun Delta Nova, segunda ne’e.
Notísia relevante: https://tatoli.tl/2025/03/05/kondisaun-estrada-rural-iha-lautein-98-grave/
Nune’e lori komunidade Lautein nia naran, agradese ba iha Governu tanba bele rona ona povu Lautein ninia halerik liliu ba iha konstrusaun estrada ninian.
“Agradese ba Nonu Governu Konstitusionál, ne’ebé lideradu husi sua exelénsia Primeiru-Ministru Kay Rala Xanana Gusmão, no mós agradese ba MPIE no MOP ne’ebé rona ona povu Lautein ninia halerik, ne’ebé halo ona konkursu públiku ba konstrusaun estrada, ne’ebé sei lansa iha tempu-badak “, nia agradese.
Nia adianta, konstrusaun estrada husi Lautein ba Com, ne’e ho distansia KM 19.760. Kompañia ne’ebé manán mak Shansi Construction Engineering Grup Corporation Limited, husi China, ho totál orsamentu $ 11.213, 813, 90.
Konstrusaun estrada husi Lautein ba Lospalos ne’e ho distánsia KM 27.980. Kompañia ne’ebé manán mak, Chongqing International Construction Corporation, ne’e mós husi Xina, ho totál orsamentu $ 18, 836, 713. 10.
Notísia relevante: https://tatoli.tl/2025/03/06/konstrusaun-estrada-lautein-ba-lospalos-no-com-sei-halo-iha-tinan-nee/
Jornalista : Osória Marques
Editór: Rafael Ximenes de A. Belo
