OEKUSI, 19 Setembru 2025 (TATOLI) – Diretór Diresaun Rejionál Administrasaun, José Tanesib Anunu, reprezenta Prezidente Autoridade Rejiaun Administrativa Espesiál Oekusi Ambeno (RAEOA), sesta ne’e halo inaugrasaun ba projetu bee-moos hodi fasilita uma-kain 53 ho populasaun 300-resin iha bairru Tua-Leu aldeia Kuantua suku Usitaku sub-rejiaun Nítibe.
Projetu ne’e, implementa husi Organizasaun Naun Governamentál (ONG) Bale Alekot Neo Oekusi (BANO) ne’ebé hetan apoiu fundu husi Caritas Austrália hamutuk rihun $13, hodi kanaliza bee husi bee-matan Oélna-Sila mai to’o komunidade sira iha bairru Tua-Leu ho distánsia kilometru haat (4 Km).
“Fasilidade ne’e nesesáriu, tanba agora bailoron, bele fasilita komunidade sira, tanba menus bee-moos, ita agradese ba parseiru internasionál Caritas Austrália liuhusi implementasaun husi ONG BANO, serbisu hamutuk ho SAS bele konstrui projetu ne’e di’ak tebes, tanba distánsia kilometru haat, hodi kanaliza ba komunidade sira,” José Anunu dehan, iha diskursu inaugurasaun, hala’o iha suku Usitaku, ohin.
Labele estraga bee-moos
Iha biban ne’e, nia fó hanoin ba autoridade lokál no komunidade sira, atu kuida fasilidade referida, atu labele estraga fasilidade sira inklui polipipe no labele estraga bee-moos, maibé utiliza tuir kalendáriu, katak loron ida bele loke dalarua de’it, nune’e bee sufisiente ba ema hotu.
Notísia relevante: https://tatoli.tl/2025/08/22/ekipa-teknika-btl-halo-levantamentu-dadus-ba-perfurasaun-bee-moos-iha-kamea/
Diretóra ONG BANO, Rosa Boquifai, agradese parseiru Caritas Austrália, tanba ho fundu ne’ebé ki’ik maibé konsege rezolve ona komunidade uma-kain 53 ho populasaun 300-resin iha bairru Tua-Leu.
“Ami agradese ba fundu na’in husi Caritas Austrália, ho sira-nia apoia mak ohin ita-bele inaugura, ne’ebé ho fundu ne’e, ami-nia interrese, primeiru tanba komunidade iha Kuantua uma-kain 53 ho populasaun 300-resin, presiza tebes, durante tinan barak, sira-nia preokupasaun bo’ot mak bee, sira iha bee-matan ida maibé do’ok, la’o kilometru ida mak foin kuru, maibé dalan sa’e foho, tan ne’e mak ONG BANO fó prioridade atu konstrui fasilidade bee hodi kanaliza besik ba sira,” nia hateten.
Notísia relevante: https://tatoli.tl/2025/01/23/permatil-konsege-hamoris-bee-matan-bee-neen-iha-foho-leolbatan/
Iha fatin hanesan, Xefe Suku Usitaku, Hilario Babo, promete sei serbisu hamutuk ho komunidade sira hodi delega hela responsabilidade atu tau matan ba fasilidade bee-moos ne’e, nune’e bele dura ba tempu-naruk.
“Ha’u lori komunidade sira-nia naran, ami hato’o agradese ba Governu ho parseeru sira-nia tulun. Ami promete katak, ami tau matan liuhusi koordenasaun ho komunidade sira atu delega hela responsabilidade ba ema rua ka tolu, atu kontrola, ezemplu, ita-bele fahe, loke de’it ho dadeer-meudia taka no lorokraik mak loke fali, tanba ita haree debitu bee menus no ki’ik, entaun fila-fali ba ita-aan rasik halo jestaun, nune’e ema hotu bele asesu no prevene istória tan de’it hadau malu bee,” líder komunitáriu ne’e hato’o.
Jornalista: Abílio Elo Nini
Editór: Rafael Ximenes de A. Belo
