DILI, 25 Setembru 2025 (TATOLI)–Prezidente Konferénsia Espiskopál Timorense (CET-sigla portugeza) no Bispu Dioseze Maliana, Don Norberto do Amaral la konkorda ho polítika Governu ne’ebé atu harii estádiu foun iha Tasi-Tolu, tanba sei halakon sítiu istóriku tolu ne’ebé importante.
“Ha’u-nia hanoin mak lalika konstrui estádiu iha-ne’ebá,” Don Norberto dehan ba jornalista sira iha Fatumeta, Dili, Kinta ne’e.
Bispu Dioseze Maliana esplika parte istóriku tolu importante ne’ebé eziste iha-ne’ebá kompostu husi fatin restaurasaun independénsia RDTL, fatin vizitasaun Amu-Papa João Paulo II no vizita Amu-Papa Francisco nian.
“Pontu tolu ne’e mak sai nu’udár pilár importante tebes iha ita-nia moris nu’udár sosiedade katólika,” nia haktuir.
Notísia relevante: Konstrui Estádiu iha Tasi-Tolu sei la destroi fatin istóriku
Dom Norberto akresenta Tasi-Tolu sai ona hanesan fatin sagradu, ne’ebé hatudu identidade nu’udár nasaun independente ida.
“Ita hatene katak fatin Tasi-Tolu sai ona hanesan fatin sagrada ida, ne’ebé ita hatudu ona indentidade nu’udár nasaun ida. Entaun, ita presiza mantein identidade ne’e,” Don Norberto enfatiza.
Antes ne’e mós, Don Virgílio Kardeál do Carmo da Silva hala’o ona enkontru ho parte Federasaun Futeból Timor-Leste (FFTL) hodi ko’alia asuntu referidu.
“Bainhira harii estádiu iha-ne’ebá, fatin furak ba misa nian ita haree muda tiha kedan. Hanesan ha’u-nia esperiénsia foin daudaun iha 10 Setembru liubá, bainhira hamriik iha altár ne’ebá haree katak Estadu harii estádiu iha-ne’e, fatin ne’e sei la furak ona,” Kardeál haktuir.
Kardeál dehan katak nia kontinua rona amu-lulik sira hotu, nune’e tempu besik sei fó pareser ba ida-ne’e tanba ida-ne’e sei estraga ambiente no natureza fatin misa nian.
Jornalista: Osória Marques
Editór: Xisto Freitas da Piedade
