DILI, 07 Outubru 2025 (TATOLI)—Reitór Universidade Nasionál Timor Lorosa’e (UNTL), João Soares Martins, hateten nia parte simu ona relatóriu husi Dekanu Fakuldade Siénsia Sosiál (FCS-sigla portugeza), relasiona ho kazu asédiu sexuál ne’ebé alegadamente envolve husi MFB hasoru estudante balun iha Departamentu Polítika Públika (DPP).
“Ha’u simu ona relatóriu husi Dekanu FCS no mós informasaun ne’ebé maihusi família estudante balun. Horisehik kedas ha’u enkamiña relatóriu ba Konsellu Dixiplinár,” Reitór UNTL informa ba jornalista sira iha UNTL, Kaikoli, Tersa ne’e.
Nia hatutan Konsellu Dixiplinár mak sei foti medida ne’ebé adekuada ba situasaun ne’ebé akontese iha DPP.
“Tanba ne’e labele foti desizaun sein investigasaun, maibé ita sei hein Konsellu Dixiplinár atu halo investigasaun ba kazu ne’e, hodi rona husi vítima no profesór ne’ebé alegadu ba situasaun ida-ne’e,” Reitór João informa.
Notísia relevante: Suspeitadu ba asédiu sexuál, estudante husu reitór demite MFB
Tuir nia katak loloos atitude sira-ne’e labele akontese, dalaruma ema barak entaun akontese, maibé importante mak buka mekanizmu ida oinsá atubele rezolve problema referidu.
“Ha’u la espera buat ne’e atu akontese. Dalabarak ona ha’u hateten tenke kria kampus ida seguru ba ema hotu. Tanba ne’e, ami hola-parte iha inisiativa kampus seguru hamutuk ho UN Women. Ita deklara katak universidade sira tenke zero toleránsia ba asédiu sexuál,” nia subliña.
Reitór haktuir, iha 2021 nia parte simu duni telefone husi estudante feto ne’ebé horisehik mós nia inan-aman ba informa kona-ba kazu referidu.
“Iha momentu ne’ebá ha’u bolu duni dekanu FCS, agora eis dekanu ona, atu haree situasaun ne’e, no mós ha’u hasoru profesór MFB, ha’u fó hatene nia no husu nia atu tenke kuidadu,” Reitór ne’e aprofunda.
Kona-ba demite profesor ne’ebé alegadu ba komete asedu sexual, Reitór João Soares Martins dehan, buat hotu sei la’o tuir investigasaun, se perigu duni tenke halo suspensaun ba profesór referidu.
“Se situasaun ne’e mak univeridade labele toma, ita sei haruka ba Komisaun Funsaun Públika atubele foti medida tuir regra KFP nian, tanba profesór ne’e hanesan dosente no funsionáriu permanente,” Martins esplika.
Reitor apela ba estudante hotu-hotu tantu sé de’it mak sai vítima ba asédiu sexuál bele hato’o keixa ba Pro-Reitór ba Provedoria no Konselamentu nian.
Entretantu, akuzadu MFB ho liafuan badak hateten ba TATOLI katak ninia konxiénsia tranquila no moos.
“Ha’u-nia konxiénsia tranquila no moos. Hein iha loron ruma ha’u kontaktu ita-boot sira (jornalista),” nia dehan bainhira TATOLI kontaktu nia liuhusi mensajen telefónema, Tersa ne’e.
Jornalista: Osória Marques
Editór: Xisto Freitas da Piedade
