DILI, 07 Outubru 2025 (TATOLI)–Jenerál husi nasaun Indonézia hamutuk 80-resin, tersa ne’e, hala’o vizita iha Timor-Leste no hasoru malu ho Tenente Jenerál Reformadu Lere Anan Timur hodi diskute kona-ba Saudozu Nicolau Lobato no David Alex Daitula nia restu mortál ne’ebé to’o ohin loron seidauk hatene nia paradeiru.
Notísia Relevante:Governu iha esperansa Prabowo loke komunikasaun entrega Nicolau Lobato nia ruin
“Ha’u ko’alia ho Jenerál hirak ne’e katak, ami ukun aan ona, uluk ita mak see kilat ba malu, konsekuénsia husi funu mak provoka lakon no mate. Timoroan ne’ebé mate barak mak hetan ona sira-nia ruin, barak mós to’o agora seidauk hetan, entaun sira-nia família husu beibeik mai ami ne’ebé uluk lidera funu ne’e. Entaun, ha’u ko’alia ho sira uluk ita mak funu ita tenke responsabiliza, ita tenke hamutuk buka ruin husi Saudozu Nicolau Lobato, David Alex Daitula ho sira seluk tan,” Jenerál Lere Anan Timur hateten ba jornalista sira hafoin ramata enkontru ho Jenerál hirak ne’e iha ninia Rezidensia, Faról, tersa ne’e.
Nia dehan, hakarak ka lakohi Indonézia tenke koopera ho Timor-Leste atu buka tuir resr=tu mortal hirak ne’ebé to’o agora seidauk hatene nia paradeiru.
“Uluk ita mak funu, agora funu hotu ona ita tenke servisu hamutuk hodi buka ruin hirak ne’e. Povu sira husu mai ami, uluk ami iha ai-laran, entaun ami husu fali ba imi, ne’e ita hotu nia responsabilidade,” Lere dehan.
Ho pedidu ne’ebé hato’o husi Lere Anan Timur, Jenerál sira husi Indonézia hatán no ba oin sei servisu hamutuk.
“Sira hatán dehan di’ak, maibé sira-nia laran ne’e hakarak duni atu ita servisu hamutuk,” Lere hateten.
Lere konfirma, vizita Jenerál hirak ne’e parte ida hodi hametin mós relasaun di’ak entre nasaun Timor-Leste no Indonézia.
“Ita-nia maluk jenerál sira-ne’ebé mai husi Indonézia ho sira-nia veteranu sira mai atu hasoru ho ita-nia veteranu sira iha Timor-Leste. Aban, sira sei ba vizita Jardin Eroi Metinaru depois mak sira fila ba Indonézia. Sira-nia prezensa iha-ne’e hodi konsolida no hametin relasaun amizade Timor-Leste ho Indonézia,” Lere dehan.
Lere subliña, Timor-Leste ho Indonézia nasaun ne’ebé viziñu tenke iha relasaun ne’ebé metin hodi promove dame no domin entre nasaun rua.
Enterantu, parte seluk kona-ba hasoru malu ho Tenente Jenerál Reformadu Lere Anan Timur tanba Indonézia hanoin ona atu halo filme ida kona-ba funu ne’ebé akontese iha tempu pasadu entre Timor-Leste ho Indonézia.
“Sira mai ne’e ko’alia mós oinsa sira atu halo filme ida kona-ba kontestu funu ita ho Indonézia iha tempu ne’ebá. Filme ne’e la’ós novela ka filme mamuk maibé nakonu ho konteúdu funu Timor-Leste nian hodi rai hanesan memoria atu nune’e jerasaun sira tuir mai labele repete tan saida mak akontese ona iha pasadu entre ita ho sira,” Lere dehan.
Iha fatin hanesan, Majór Jenerál Komaruddin Simanjuntak hateten, vizita ne’e atu hametin relasaun amizade entre Timor-Leste no Indonézia.
“Ami-nia vizita ne’e atu hametin relasaun di’ak entre nasaun rua (2). Uluk mai iha ne’e hanesan inimigu, maibé agora ami hasoru malu hanesan amigu, ita hamutuk mak oinsa hadi’a nasaun rua (2) ne’e ba oin,” Komaruddin hateten.
Notísia Relevante: Família husu Estadu buka tuir saudózu Daitula nia ruin
Jornalista : Hortencio Sanchez
Editór : Cancio Ximenes
