AINARO, 13 Outubru 2025 (TATOLI)—Prezidente Repúblika, José Ramos-Horta, husu ba joven sira atu estuda maka’as hodi halo Timor-Leste sai boot iha futuru.
“Joven sira imi tenke estuda, estuda, estuda maka’as, estuda maka’as atu timor bele sai boot, ida ne mak hau nia mensajen boot ba imi hotu,” Prezidente Ramos-Horta hateten bainhira sai oradór prinsipál iha diálogu ho tema “Prezidente Ramos-Horta ho Povu” iha Pauzada Maubisse, Ainaro, segunda ne’e.
Nia dehan, inan ho aman sira esforsu-aan maka’as hodi suporta oan sira ba eskola tenke foku ba eskola tanba nasaun ne’e iha jerasaun foun nia liman.
“Diploma universidade la’ós dalan ikus, maibé prepara dalan ida hodi prepara-an di’ak liu ba futuru. Nasaun sira boot sai riku ne’e tanba nia ema sira estuda maka’as mak muda sira-nia nasaun, ezemplu Singapura nasaun kiik maibé nia riku tanba nia ema sira estuda maka’as,” Horta hateten.
Ba oin, nai dehan, Governu tenke tau orsamentu boot ba edukasaun atu nune’e bele fasilita estudante sira-nia estudu ho di’ak.
“Se ha’u mak Primeiru-Ministru tau osan barak liu ba setór edukasaun, segundu mak saúde, terseiru mak agrikultura, maibé edukasaun tenke tau duni osan boot,” Hortadehan.
Programa “HAKBESIK” ho topiku “Prezidente Ramos-Horta ho Povu” hanesan programa ida-husi Agência TATOLI ne’ebé atu lori Estadu besik ho povu no rona direta povu nia preokupasaun no fó informasaun ba povu kona-ba papel importante Estadu nian.
Ajénsia Notisioza Timor-Leste, TATOLI I.P nu’udar ajénsia ofisiál Estadu Timor-Leste nian. Tanba ne’e Ajénsia Notisioza TATOLI iha kna’ar halo promosaun programa Estadu nian, espesialmente prosesu implementasaun podér lokál no podér lokál ne’ebé prevista iha Konstituisaun RDTL artigu 5 (desentralizasaun), artigu 71 (organizasaun administrativa) no artigu 72 (podér lokál).
Husi baze fundamenta hirak-ne’e fó dalan ba Governu no Parlamentu Nasionál aprova ona lei podér lokál no desentralizasaun administrativa, lei eleitorál eleitorál, lei finansa munisipál no sei iha tán lei komplementár seluk ne’ebé oras Governu dezenvolve hela.
Jornalista : Hortencio Sanchez
Editór : Cancio Ximenes
