BOBONARU, 19 Outobru 2025 (TATOLI) –Governu liuhusi Ministru Obras Publikas (MOP), Samuel Marçal, afirma katak prosesu alargamentu iha estrada kuluhun mantein ho espasu metru 23,74 no sei la loke tan ona eapasu.
Ministru Obras Publikas, Samuel Marçal, hateten, prosesu loke espasu estrada ne’e foin daudaun loke tiha ona entaun agora kontinua halo reabilitasaun hanesan drainajen sira.
“Espasu iha estrada kuluhun foin dadauk ita loke ona no la presiza atu loke tan, maibé prosesu sira ne’e la’o hela tanba obra ne’e seidauk hotu entaun hotu-hotu sempre ko’alia, enkuantu obra ne’e hotu tiha mak ema foin bele sente dezenvolvimentu”, Ministru informa ba jornalista sira iha ámbitu inagurasaun ba liña eletrisidade iha suku Lupa, postu-administrativu Lolotoe, munisípiu Bobonaru, sábadu ne’e.
Governate ne’e haktui, hanesan ita haree uluk prosesu alargamentu husi parte BJ Habibie nian ba to’o kruzamentu Bidau nian bainhira obra ne’e seidauk finaliza ema hotu ko’alia de’it, maibé konklui ona ema ida-idak hahú uza ona fatin ne’e.
“Ita labele bandu tanba ema hotu-hotu iha direitu atu krítika. Ami husi Ministéria Obras Publikas simu krítika sira ne’e hotu, entaun buat sira ne’e ami konsidera hanesan kontribuisaun di’ak ida”, nia dehan.
Nune’e, autoridade governativa ne’e hatutan asaun sira hanesan ne’e ajuda fó hanoin ba ema hotu atu bele fanun malu hodi hadia rai ida ne’e sai di’ak liután.
Enkuantu prosesu reabilitasaun iha estrada kuluhun daudaun ne’e kompañia Montana Diak reabilita hela drainajen sira no projetu ne’e atinje ona 40%.
Jornalista: Alexandra da Costa
Editór: Rafael Ximenes de A. Belo
