DILI, 29 Outubru 2025 (TATOLI)-Australian Broadcasting Corporation International Development (ABC ID) disponibiliza formasaun kona-ba Storytelling no Mobile Journalism (MoJo) ba jornalista Ajénsia Notisioza Timor-Leste – Tatoli.
Formasaun ne’e ho objetivu mak hasa’e koñesimentu tékniku hasai fotografia, kombina hakerek iha dijitál no mídia sosiál no foti vídeo hodi adapta an ho avansu mundu teknolojia ne’ebé ohin loron dezenvolvidu tebes.
Prezidente Konsellu Diretivu Tatoli, Noémio Falcão, agradese ba kooperasaun ho ABC ID, ne’ebé kontinua apoiu kapasitasaun ba jornalista profisionál iha mídia Timor-Leste. “Formasaun ne’e valór boot tebes ba ami”, nia hato’o iha enserramentu formasaun iha edifísiu Palm Business, Surikmas, ohin.
Nune’e hein katak ho koñesimentu ne’ebé hetan sei implementa iha serbisu loroloron, liuliu ho teknolojia ne’ebé ohin loron avansu tebes.
Formasaun ne’e fó husi formadora na’in-rua husi ABC ID, Julie Hornsey no Caroline Winter, no fasilitadora Fernanda Maria.
Jornalista husi ABC, Caroline Winter, entuziasmu ho kooperasaun ho mídia estatál ne’e no hein katak ho espriénsia ne’ebé fahe ekipa bele lori filafali bá serbisu fatin hodi implementa.
Atividade ne’e realiza durante loron rua, 28 to’o 29 Outubru ne’e, partisipa husi formandu na’in-10, kompostu feto haat no mane neen mak hanesan repórter, fotógrafu no sinegrafista.
Iha enserramentu Natividad ne’e, Prezidente Tatoli akompaña husi Vise-Prezidente ba asuntu Mídia no Jornalístika, Zezito da Silva, no formadora husi ABC ID atribui sertifikadu ba formandu sira.
Notísia relevante: ABC Austrália-TATOLI hala’o servisu hamutuk dezenvolve servisu jornalizmu
Jornalista: Nelson de Sousa
Editora: Maria Auxiliadora
