DILI, 11 Novembru 2025 (TATOLI)—Diretór Nasionál Ensinu Sekundáriu Jerál Ministériu Edukasaun (ME), Benjamin Fernandes informa, iha 17 Novembru tinan ne’e, Empreza Xeira VIII Unipessoal, Lda hahú halo instalasaun ba sistema eletrónika ba ensinu sekundáriu sira.
“Apoiu komputadór ne’e semana oin kompañia hahú instala ona iha eskola sira teritoriu ne’ebé identifikadu ona,” Benjamin Fernandes dehan ba TATOLI iha resintu Ministériu Edukasaun, Vila Verde, Dili, Tersa ne’e.
Nia dehan ida-ne’e prepara ba inísiu anu letivu 2026 nian, atu halo preparasaun ba prosesu aprendizajen liuhusi eletrónika.
Nune’e, ME planeia instala uluk mak iha Oekusi mak eskola Sekundáriu Jerál Palaban, Munisipiu Baukau mak Sekundáriu Jerál nú. 01 no nú. 02 no Eskola Sekundária ida iha Baguia, Vikeke mak ESJ Olokasa no ESJ 04 Setembru Vikeke, Dili mak ESJ 12 Novembru Bekora no ESJ nú. 04 Setembru UNAMET Dili.
Ermera mak ESJ Maukruna, ESJ Nino Konis Santana no ESJ ida iha Railaku, Manufahi mak ESJ Betano no ESJ 1912, Suai ESJ nú. 01 no ida iha Postu Zumalai, Manatutu ESJ Kay Rala, Lautein iha Nino Konis Santana no ESJ Lere Anan Timur.
Jornalista: Osória Marques
Editór: Xisto Freitas da Piedade
