DILI, 14 Novembru 2025 (TATOLI)–Koordenadór Gabinete Kurríkulu Unidade Nasionál Ministériu Edukasaun (ME), João Maupelu informa estudante auzente hamutuk 161 sei tuir ezame nasionál ba segunda xamada nian iha Tersa semana oin (18/11).
“Estudante sira-ne’e la tuir ezame nasionál tanba moras no balun envolve iha eventu internasionál (atleta). Estudante ida husi eskola ida iha Munisípiu Ermera no ida hosi eskola Kanosa, ida-ne’e federasaun desportiva mak haruka karta mai entaun ita anota no sira sei tama iha segunda xamada nian,” Maupelu hateten ba jornalista sira, iha nia knaar fatin, Vila Verde, Dili, Sesta ne’e.
Maupelu hatutan preparasaun pontu ezame ba segunda xamada ne’e ekipa kurríkulu prepara ona, hein realiza ezame.
Notísia relevante: Estudante 225 auzente iha ezame nasionál
“Segunda xamada nian, pontu ezame preparadu, tanba antes halo preparasaun ba ezame nasionál primeira xamada nian, ita rezerva kedas pontu ezame ne’e. Ne’ebé, hein realiza segunda xamada,” nia esplika.
Estudante hamutuk 161 husi nivel territóriu ne’e kompostu husi ensinu báziku iha 63, ensinu sekundáriu jerál iha 77 no ensinu sekundáriu tékniku vokasionál 21.
Aleinde ne’e, Maupelu relata, progresu korresaun ezame nasionál ramata ona no hein halo re-verifikasaun ba korresaun.
“Korresaun ohin ramata ona. Maibé, ita re-verifikasaun fali korresaun dahuluk nian. Depoiz durante loron sanulu (10) nia laran ita sei halo re-verifikasaun ida ba ida,” João dehan.
Koordenadór ne’e hateten, tuir kalendáriu edukasaun, iha 13 Dezembru sei fó-sai rezultadu ka valór estudante nian.
Jornalista: Osória Marques
Editór: Xisto Freitas da Piedade
