OEKUSI, 19 Novembru 2025 (TATOLI) – Konstrusaun uma maternidade ne’ebé konstrui iha Sentru Saúde Kiomaonteko suku Costa sub-rejiaun Pante Makasar Rejiaun Administrativa Espesiál Oekusi Ambeno (RAEOA), daudaun ne’e atinje ona 25% no tuir kontratu empreza sei konklui iha fulan -Dezembru 2025 ne’e.
Xefe Interinu Sentru Saúde Kiomaonteko, António Firdaus Dos Santos Neno, hateten katak, kontrusaun uma maternidade ne’e hetan apoia fundu direita mai husi Ajénsia Internasionál Partnership for Human Development (PhD), Austrália.
Notísia relevante:ISPA no diarreia rejistadu maioria iha Sentru Saúde Kiomaonteko – Pante Makasar
Xefe ne’e hateten, objetivu husi konstrusaun atu fasilita inan isin -rua sira bainhira partu hiha fasilidade saúde bele asesu fatin dignu no seguru, tanba barak ona Sentru Saúde Kiomaonteko, sempre difikulta inan sira partu iha Sentru Saúde Kiomaonteko.
“Durante ne’e ita hetan vizita tantu husi nasionál no serbisu saúde rejionál rasik, mai observa ita-nia inan sira-ne’ebé bainhira hetan asisténsia partu iha fasilidade saúde Kiomaonteko, sira mós rekoñese, fatin klo’ot no la sufisiente, sempre difikulta parteira sira atu fó asisténsia, tan ne’e mak, ita agradese bo’ot ba polítika ne’ebé iha, ita halo serbisu koordenasaun ho Ajénsia PhD, ikusmai ita hetan resposta pozitivu, hodi tulun ita atu harii uma maternidade ne’e,” nia hateten iha sentru saúde Kiomaonteko, ohin.
Nia espera, emprez konstrut0ra bele aselera serbisu, nune’e iha 2026 bele entrega ona ba sentru saúde atu funsiona ba nesesidade públiku.
Iha fatin hanesan, Tékniku husi Empreza Save Guard Unipesoál Lda, Agostinho dos Remedios, promete sei kumpre dokumentu kontratu, tanba oras ne’e daudaun iha ona faze hada tijolu.
“Ami serbisu kuaze fulan ida ona, nia progresu agora daudaun atinje ona 25%, ne’ebé iha kontratu ami tenke finaliza iha Dezembru tanba fulan tolu de’it ka la’e, ne’ebé ami sei esforsa hodi entrega iha fulan oin, tanba 25% ne’e ami hada ona bataku (tijolu),” nia promete.
Notísia relevante:Komisaun F deteta problema tolu iha Ospitál Referál Oekusi
Entretantu, konstrusaun ne’e nia medida 15×7 kompleta kedas ho sala ualu (8), haris-fatin rua (2), no sala vizita rua (2), ne’ebé ezekuta hosi empreza Save Guard Unipesoál Lda ho valór kontratu $85,905.88 ho durasaun serbisu fulan tolu, hahú iha loron 26 Setembru tenke konklui iha loron 31 Dezembru 2025.
Jornalista: Abílio Elo Nini
Editór: Rafael Ximenes de A. Belo
