BOBONARU, 19 Novembru 2025 (TATOLI) –Vítima inundasaun sira iha aldeia Miguir, suku Aidaba Leten, postu administrativu Atabae, munisípiu Bobonaru, husu ba Ministeriu Obra Públika (MOP) atu mobiliza ekipamentu pezadu, nune’e hasai sedimentasaun ne’ebé daudaun intupidu hela iha ponte Miguir hodi evita tan inundasaun ne’ebé mai ho volume bee boot.
“Hau lori komunidade aldeia Miguir nia naran atu hato’o ba Obra [MOP]. Problema primeiru mak ponte ne’e tanba nia ku’ak no kloot entaun bee lori fo’er sira ne’e mai sena hotu. Bee atu liu mós la di’ak ona, bee ne’e tenke liu mai fahe-an, balu ba merkadu sorin, balu mai iha ne’e. Tanba ne’e ami husu apoiu, se la halo intervensaun, komunidade sei hasoru inundasaun boot liu ida-ne’e”, Xefe Aldeia Miguir, José Angelino, hateten.
Nia haktuir katak inundasaun ne’ebé akontese iha tuku 15h00, iha tersa-feira, loron 18 Novembru, depoizde udan kuaze oras rua-resin halo komunidade triste no trauma, tanba foin ba dahuluk Miguir afetadu ba inundasaun ho volume bee maka’as. “Horisehik ita la hatene bee atu sa’e. Nia sa’e ne’e hanesan tasi mak sa’e mai ne’e”, José realsa.
Notísia relevante: Vítima inundasaun iha Miguir simu apoiu emerjénsia
Administradór Postu Administrativu Atabae, Pedro Laco Buti, rekomenda ba Ministeriu Obra Publika atu buka meiu muda ponte nia modelu hodi argumenta katak fo’er intupidu ne’e tanba rezulta husi inundasaun foin lalais ne’e, tanba espasu iha ponte okos kloot liu.
“Obra ne’ebé halo dalaruma husik hela espasu balu para bee ne’e bele kontinua estraga komunidade nia hela-fatin. Ita-nia objetivu halo obra ne’e atu fó seguransa ba komunidade, más to’o ikus inundasaun ne’e nafatin afeta komunidade. Tanba ne’e, presiza hadi’a ou kontinua ho ida ne’e”, nia salienta.
Iha sorin seluk, Sekretáriu Autoridade Munisípiu Bobonaru ba Asuntu Sosiál, Júlio Carvalho Caero, promete sei hato’o preukupasaun ne’e ba parte kompetente hodi solusiona. “Se bele aban atende kedas, se la’e udan fali nia sei afeta nafatin tanba fo’er seidauk hamoos”, nia afirma.
Hafoin akontesimentu inundasaun, iha kuarta-feira, 19 Novembru dader, ekipa téknika MO halo ona observasaun iha terrenu.
Tuir dadus ne’ebé Diresaun Servisu Munisipál Protesaun Sivíl Autoridade Munisípiu Bobonaru no Autoridade Protesaun Sivíl rekolla, vítima afetada ba katástrofe ne’e hamutuk uma-kain 18 ho membru família 75.
Jornalista: Sérgio da Cruz
Editora: Maria Auxiliadora
