DILI, 24 Novembru 2025 (TATOLI)—Eskola Ensinu Báziku Sentrál (EBC-sigla portugeza) Celestino Peloi Borodua, Suku Atelari, Postu Administrativu Laga, Munisípiu Baukau, durante ne’e enfrenta problema menus profesór, ne’ebé difikulta tebes ba prosesu aprendizajen estudante sira-nian iha saladeaula. Entretantu, Ministra Edukasaun, Dulce de Jesus Soares deklara sei tau-matan ba asuntu ne’e.
Diretór Eskola Ensinu Báziku Sentrál Celestino Peloi Borodua Atelari, Zacarias de Sousa Gama, relata eskola ne’ebé nia lidera, menus profesór husi EBC ho nia filiál sira.
“EBC Celestino Peloi Borudua Atelari, ami iha eskola filiál lima no paralelu rua, maibé durante ne’e ami enfrenta mak menus profesór ba matéria edukasaun fizika, siénsia naturál, fízika, língua portugeza, inglés no desportu,” nia dehan ba TATOLI via telefónika, Segunda ne’e.
Nia dehan, kona-ba menus profesór, dalabarak ona sira hato’o pedidu ba Servisu Edukasaun Munisípiu Baukau, maibé laiha resposta.
Tuir dadus, estudante EBC Celestino Peloi Bederua Atelari, totál hamutuk na’in-865, kompostu husi EBC, EBF no Paralelu, ho nia totál profesór na’in-58, maibé husi númeru referidu profesór na’in-4 idade reforma, na’in-2 moras permanente, na’in-haat (4) lakon vida no daudaun ne’e na’in-48 mak ativu.
Husi totál numeru estudante na’in-865, fahe ba EBC Borudua Atelari 1o, 2o no 3o siklu na’in-198, EBF 1o, 2o siklu Uakala na’in-76, EBF 3o siklu sagadate na’in-176, EBF 3o siklu Ai-Issilarigua na’in-122, EBF 1o, 2o siklu Boleha na’in-108.
Aleinde ne’e, husi EBF paralelu 1o no 2o siklu livagua na’in-135 no EBF paralelu 1o siklu Bela-Vista na’in-50.
Nia informa eskola referida dezde uluk to’o agora sempre hasoru probelema menus profesór.
“Tanba ne’e, ha’u husu ba parte relevante liuliu Ministériu Edukasaun, bainhira koloka profesór sira, labele haree liubá kestaun polítika, maibé tenke haree ba nesesidade eskola sira-nian,” nia dehan.
Zacarias konsidera menus profesór sai obstákulu ba prosesu aprendizajen, nune’e profesór sira buka alternativu hodi orienta pesoál konsellu diretiva sira hodi prenxe matéria ne’ebé profesór laiha.
“Ida-ne’e hanesan devér de’it, atu ami bele responde ba nesesidade estudante sira-nian, maibé atu garantia kualidade edukasaun ha’u sente susar. Tanba ne’e, ami espera iha tinan ida-ne’e, ami-nia eskola bele hetan bolsu kandidatu balun,” nia espera.
Hatán ba kestaun ne’e, Ministra Edukasaun, Dulce de Jesus Soares, hateten nia parte konsidera problema ne’e maibé antes atu halo kolokasaun ba profesór sei haree uluk ba kuadru pesoál.
“Ministériu Edukasaun (ME) konsidera ida-ne’e, maibé atu halo kolokasaun ba profesór ita sei haree uluk kuadru pesoál, tanba kuadru pesoál mak sei deside iha eskola ne’ebá ita presiza profesór na’in hira,iha área saida no nivel ensinu saida,” Ministra Eukasaun subliña.
Kona-ba profesór sira-nia rekomendasaun, membru Governu ne’e informa, ida-ne’e sira-nia direitu atu husu ka rekomenda, maibé tenke tuir kuadru pesoál atu prova katak prezisa profesór ka lae.
“Tanba ita iha ona kuadru pesoál husi pre-eskolár, ensinu báziku to’o ensinu sekundáriu. Sira husu ne’e direitu sira-nian, maibé ita tenke haree uluk, katak atu responde profesór ka presiza re-kolokasaun, nune’e mós ita sei haree profesór ne’e tama iha agrupamentu ida-ne’ebé,” Ministra Dulce informa.
Lideransa másima edukasaun ne’e informa, husi agrupamentu sira-ne’e, dalaruma iha eskola referida profesór balun nia karga oráriu seidauk loos.
“Dalaruma iha eskola ne’ebé ita-boot temi, profesór balun nia karga oráriu seidauk loos, ka iha agrupamentu sira-ne’e mak laiha, ita hakat bá agrupamentu seluk. Se agrupamentu seluk mós laiha nafatin ita hakat bá postu administrativu. Se postu administrativu laiha, ita hakat bá munisípiu. Ida-ne’e mak sistema ne’ebé ita koko oinsá atu jere rekursu umanu iha edukasaun,” nia hakotu.
Jornalista: Osória Marques
Editór: Xisto Freitas da Piedade
