DILI, 28 Novembru 2025 (TATOLI) – Prezidente tranzitóriu Giné-Bisau nian, Jenerál Horta Inta-A, ohin nomeia ona Ilídio Vieira Té, eis-ministru hosi Prezidente depostu Embaló, nu’udar Primeiru-Ministru no Ministru Finansa, fó-sai hosi prezidénsia guiniense liuhosi despaxu ida.
Ilídio Vieira Té, ho tinan 42, iha lisensiatura iha Direitu Públiku hosi Maroko no mestradu iha Direitu Umanu Interkulturál no Dezenvolvimentu hosi universidade española ida.
Nia hetan nomeasaun nu’udar Ministru Finansa iha 2022. Asosiadu konfiansa hosi eis-prezidente guiniense Umaro Sissoco Embaló, ne’ebé hetan demisaun iha loron 26 tanba golpe militár.
Vieira Té hanesan jestór kampaña prezidensiál Embaló nian bainhira husu reeleisaun ba mandatu tinan lima daruak.
Prosesu eleitorál ne’ebé refere hetan suspensaun hosi komandu militár ida ne’ebé hadau podér iha Giné-Bissau liuhosi golpe Estadu.
Ilídio Vieira sei troka Braima Camará, ne’ebé maka hetan nomeasaun nu’udar Primeiru-Ministru hosi Sissoco Embaló iha loron 7 fulan-agostu tinan 2025.
Jenerál Horta Inta-A fó pose nu’udar Prezidente tranzitóriu Guiné-Bissau nian iha serimónia ida ne’ebé hala’o iha Kuartél Jerál Estadu-Maiór Jerál Forsa Armada Giné nian, loron ida hafoin militár hadau podér iha nasaun ne’e, molok fó-sai rezultadu eleisaun jerál 23 Novembru nian.
Militár fó-sai kona-ba hasai Prezidente Umaro Sissoco Embaló, suspende prosesu eleitorál, taka mídia no impoin restrisaun.
Eleisaun sira, ne’ebé hala’o lahó insidente, lahó prezensa hosi partidu prinsipál opozisaun nian, Partidu Afrikanu ba Independénsia Giné no Cabo Verde nian (PAIGC, sigla portugés), no nia kandidatu, Domingos Simões Pereira, ne’ebé esklui hosi korrida no deklara sira-nia apoiu ba kandidatu opozisaun nian, Fernando Dias da Costa.
Simões Pereira hetan kaer, no tomada pose militár nian hetan denunsia hosi opozisaun hanesan manobra ida hodi impede divulgasaun hosi rezultadu eleisaun.
Fonte: RTP
Notísia relevante: Prezidente Giné-Bisau ne’ebé hetan demisaun to’o ona iha Senegál ho seguru
