DILI, 06 Dezembru 2025 (TATOLI)—Primeiru-Ministru (PM), Kay Rala Xanana Gusmão, ohin, hamutuk ho delegasaun dezloka ona bá Jogjakarta Indonézia hodi hasoru-malu ho ekipa Indonézia nian atu hala’o segunda ronda kona-ba negosiasaun fronteira marrítima entre rai rua nian.
Antes dezloka bá Indonézia horiseik (05/12) Primeiru-Ministru hasoru malu uluk ho Prezidente Repúblika (PR), José Ramos-Horta hodi atualiza katak, viajen bá Jogjakarta ohin hodi partisipa iha segunda ronda negosiasaun ho Indonézia tanba antes ne’e ekipa husi nasaun rua hahú ona negosiasaun primeira ronda iha Dili.
Nia dehan, durante iha negosiasaun ne’e mós Xefe Governu sei introdús bá Governu Indonézia kona-bá inisiativa hodi realiza “nahe biti bo’ot” ko’alia nu’udár maun-alin iha fronteira Naktuka ho Amfoang.
Antes ne’e Xanana dehan, objetivu lolos diskute fronteira máritima ho Indonézia bainhira loos ona, bele fó biban ba Timor-Leste hodi halo kontrolu ba nia tasi no rikusoin sira.
“Importante mak ne’e, bainhira fronteira tasi loos ona, ita bele kontrola ita-nia tasi ho rikusoin sira,” nia dehan.
Nia hateten, diskusaun ho Indonézia ne’e kona-ba fronteira máritima maibé sei ko’alia mós kona-ba fronteira terrestre liuliu fronteira Naktuka.
“Ha’u dehan ona ba Prezidente katak, ha’u sei fó lembra nafatin no fó lembra ba ekipa delegasaun atu ko’alia ho Indonézia katak fronteira Naktuka seidauk finaliza maibé ita komprinde ho kalma. Iha Indonézia, ha’u sei fó lembra nafatin ba sira atu diskute hodi finaliza,” nia dehan.
Nia hatutan, sei ko’alia mós ba Governu Indonézia katak, foin lalais nia vizita ba Oekuse konsege to’o iha Naktuka no ko’alia ho komunidade iha ne’ebá oinsá atu nahe biti boot entre sira sorin ho sira Indonézia tanba mesak família.
“Entaun, sira informa mai ha’u katak iha loron 10 fulan-Dezembru mai, sira sei nahe biti boot entre parte rua hodi dame malu no rezolve probelama ne’ebé iha, nune’e fasilita Governu Indonézia atu konkorda ho ita hodi marka tuir akordu ne’ebé Portugál ho Olanda tau ona,” nia dehan.
Negosiasaun bá fronteira marítima entre nasaun rua sei hala’o durante loron-tolu (8-10 Dezembru 2025) iha Jogjakarta.
Jornalista : Arminda Fonseca
Editór: Rafael Ximenes de A. Belo
