OEKUSI, 17 Dezembru 2025 (TATOLI) – Ministériu Agrikultura, Pekuária, Peska no Floresta (MAPPF) liuhusi Unidade Kuarentena no Bioseguransa, hala’o enkontru bilaterál ho kuarentena Nusa Tenggara Timur (NTT), Indonézia, hodi diskute planu tékniku no regra kona-ba esportasaun no importasaun produtu agríkola, pekuária no floresta ba pontu estrada Sakato-Wini no Oésilo-Napan.
Enkontru bilaterál ne’e ho tema ‘Armónia serbisu no hametin relasaun serbisu iha área fronteira hodi fasilita atividade importasaun no esportasaun produtu agríkola’.
Diretór Kuarentena no Bioseguransa Timor-Leste, Manuel da Costa, informa, enkontru bilaterál ne’ebé hala’o entre Timor-Leste ho Indonézia atu diskute téknikamente kona-ba importasaun produtu agríkola, animál inklui plantasaun liuhusi fronteira ho legalmente, nune’e bele iha kontrolu prevensaun moras.
Dirijente ne’e, afirma enkontru referidu hanesan faze dahuluk atu troka informasaun téknika, tanba ne’e ekipa téknika kuarentena sei hato’o proposta ba nível altu hodi halo sosializasaun ba komunidade sira, hafoin bele implementa planu importasaun no esportasaun ba produtu sira liuhusi fronteira terrestre.
“Enkontru ne’e importante ba kuarentena Timor-Leste, tanba ita tama ona membru OMK no ASEAN, no mós ita sei implementa sanitária standard (padraun). Ita mós sei halo esportasaun, importasaun produtu agrikultura, ida-ne’ebé mak ita bele ona no ida-ne’ebé ita seidauk bele, entaun enkontru bilaterál ne’e atu troka informasaun téknika iha fronteira nian, atu identifika obstákulu no problema sira-ne’ebé ita hasoru iha fronteira, nune’e ita bele propoin proposta ba polítika nível altu sira ba futuru ita-bele dezenvolve liután implementasaun iha terrenu,” nia hateten iha restaurante Nidela Oekusi, ohin.
Reprezentante Kuarentena Wini no Napan Indonézia, Gandaya Muhadad, konfirma, diskusaun bilaterál ne’e, pertinente, oinsá bele fahe informasaun téknika ba rai rua nian, kona-ba importasaun no esportasaun produtu no animál sira, hodi evita transaksaun ilegál ho moras.
Nia afirma katak, durante 2025, kuarantena Indonézia konsege halo destroisaun ba produtu agríkola inklui animál hamutuk tonalada ida tanba komete infrasaun ho ilegalmente liuhusi fronteira.
“Enkontru ne’e dalarua ona. Antes ne’e, ita realiza ona iha Mota-Ain, ne’ebé sorumutu sira hanesan pertinente tebes, tanba NTT fronteira direita ho Timor-Leste, entaun presiza hamutuk fahe informasaun, nune’e bele evita moras labele ultrapasa liuhusi fronteira, tanba de’it importasaun no esportasaun,” nia hateten.
Notísia relevante: https://tatoli.tl/2025/09/09/empreza-sira-selu-multa-rihun-25-ba-kuarentena-tanba-komete-infrasaun/
Entretantu marka prezensa iha enkontru bilaterál ne’e, mai husi kargu xefia sira husi RAEOA, autoridade Indonézia, Alfandega, migrasaun, aeroportu inklui seguransa Polísia Unidade Patrullamentu Fronteira (UPF) no Tentara Nasional Indonesia (TNI).
Jornalista: Abílio Elo Nini
Editór: Rafael Ximenes de A. Belo
