OEKUSI, 29 Dezembru 2025 (TATOLI) – Prezidente Autoridade Rejiaun Administrativa Espesiál Oekusi Ambeno (RAEOA), Régio da Cruz Salu, segunda ohin, fó-sai katak, tuir ajenda konfirmadu, aban tersa-feira, Primeiru-Ministru, Kay Rala Xanana Gusmão, sei realiza seremónia natál fraternizasaun entre komunidade bairru Naktuka ho komunidade husi Oépoli Indonézia, sei hala’o iha Postu Unidade Patrullamentu Fronteira (UPF) Usapiba’at aldeia Bítila suku Bene-Ufe sub-rejiaun Nítibe.
“Ita-nia Maun-Boot, aman ba rekonsiliadór mós sei vizita Oekusi aban, faz parte selebrasaun tinan foun. Ita konvida Maun-Boot atu bele partisipa iha ajenda aban, natál hamutuk ho maun-alin sira husi Naktuka no Oépoli iha Usapiba’at nu’udar Atoni-oan hotu. Ita fó ona informasaun antes liuhusi karta ofisiál tanba Maun-Boot hanesan entidade tuteladu Oekusi. Ne’ebé, konfirmadu ona, aban Primeiru-Ministru partisipa, tanba programa ne’e, Maun-Boot mak inísia no rekomenda tenke realiza natál fraternizasaun fronteira entre Naktuka ho Oépoli,” nia hateten iha salaun Alfándega Oekusi, ohin.
Notísia relevante:Xanana husu Naktuka-oan promove dame hodi hein solusaun ba problema fronteira terestre
Autoridade RAEOA ne’e subliña, objetivu husi natál fraternizasaun ne’e, atu hametin lasu amizade entre komunidade Naktuka ho Oépoli tanba istorikamente nu’udar ema Atoni ho lian baikeno, nune’e presiza vizita malu iha ámbitu natál no tinan foun.
“Nu’udar ema Atoni, ema dawan ne’ebé iha jerasaun ida de’it dezde uluk, tanba iha loron boot natál no tinan foun ita tenke vizita malu. Ita kontente tanba maun-alin sira husi Oépoli Kupang NTT mesak ita-nia família de’it, diferénsia ba bandeira maibé la diferénsia ita hanesan ema Atoni. Ita sei hasoru malu iha Usapiba’at, aban,” nia hateten.
Notísia relevante:Xanana sei hasoru Prabowo aborda fronteira Naktuka tuir akordu Olanda no Portugál
Notísia relevante:PM Xanana orienta Autoridade RAEOA-ADN konstrui ponte iha mota Noebesi bá Naktuka
Jornalista: Abílio Elo Nini
Editór: Rafael Ximenes de A. Belo
