BOBONARU, 26 Marsu 2026 (TATOLI)-Autoridade Munisípiu Bobonaru (AMB) forma ekipa ida, iha tempu badak, hodi monitoriza regularmente implementasaun Programa Merenda Eskolár (PME) tinan letivu 2026 bazeia ba artigu 20 husi dekretu-lei númeru 3/2025 kona-ba supervizaun nian.
Ekipa ne’e sei indika husi Prezidente Autoridade Munisípiu no xefia husi Sekretáriu Asuntu Sosiál. Membru sira mai husi reprezentante Servisu Munisipál Finana, Edukasaun, Saúde, no Seguransa Alimentár.
Prezidente Autoridade Munisípiu Bobonaru, Paulo Moniz Maia, dehan supervizaun ne’e halo atu vizita eskola sira ne’ebé implementa merenda eskolár hodi verifika periodikamente fornesimentu produtu alimentár, kualidade produtu alimentár ne’ebé fornese ba eskola, kondisaun armazein no kondisaun refetóriu sira. Ekipa sei elabora relatóriu kona-ba implementasaun no formula rekomendasaun sira ne’ebé atu hadi’ak implementasaun programa referidu.
Notísia relevante: EJP 38 asina kontratu ho Autoridade Munisípiu Bobonaru hodi implementa PME 2026
“Servisu ida-ne’e ita sei forma ekipa ida atu halo monitórizasaun rotina. Diretór edukasaun ho nia ema mesak monitoriza labele, entaun ita serbisu hamutuk haree lisuk asuntu merenda eskolár”, nia hateten iha Salaun Maria Tapó, ohin.
Diresaun Servisu Munisipál ba Fiskalizasaun, Inspesaun-Jerál Administrasaun Estatál mai ho nia knaar atu tau-matan ba funsionamentu órgaun sira, inklui supervizaun ba PME.
“Nia serbisu atu halo de’it fiskalizasaun no auditoria. Ha’u husu atu komisaun ida-ne’e bele kumprr nia serbisu hodi asegura implementasaun Programa Merenda Eskolár bele la’o di’ak, tuir manuál no kumpre lei sira. Tanba iha tinan kotuk Parlamentu levanta kona-ba asuntu falta monitorizasaun ba eskola sira”, nia relata.
Ba implementasaun PME trimestre dahuluk tinan ne’e, Servisu Finans transfere ona orsamentu 35% housi totál alokasaun anuál milaun $1,841,68.
PME tinan letivu ne’e implementa iha Pré-Eskolár Públiku 42, Ensinu Báziku Sentrál Públiku no Filiál 137, Ensinu Pré-Eskolár Katólika Privadu 9 no Ensinu Bázíku Katóliku Privadu 16.
Totál estudante benefisiáriu programa ne’e hamutuk 30.178, kompostu husi Pré-Eskolár Públiku 2.494, Ensinu Báziku Públiku 24.961, Ensinu Pré- Eskolár Katóliku Privadu 471 no Ensinu Báziku Katóliku Privadu 2.252.
Notísia relevante: Fornesedór PME iha Bobonaru tenke prepara ai-han tuir menú
Jornalista: Sergio da Cruz
Editora: Maria Auxiliadora
