OEKUSI, 29 Marsu 2026 (TATOLI) – Padre Luís Goveia Leite, dirije misa domingu Ramus iha pároku Igreja Nunbei, Suku Kosta, Sub Rejiaun Pante Makasae, Rejiaun Administrativu Espesiál Oekusi Ambeno (RAEOA), husu ba sarani sira atu halo reflesaun no banati sakrifísiu Jesus Kristu hodi hametin fiar atu perdua malu haburas domin no dame iha sosiedade.
“Ohin, Misa domingu Ramus ne’e, importante tebes ba ita sarani atu halo reflesaun, oinsá banati tuir Jesus nia sakrifísiu sira-ne’ebé nia halo ba, hodi salva ita salan sira-ne’ebé ita halo iha mundu ne’e, tan ne’e ho semana santa ne’e, ita hotu espera katak, lori nafatin dame no domin atu garante estabilidade iha ita-nia rai hodi kontribui ba dezenvolvimentu sustentavél, nune’e povu bele moris di’ak,” Padre Luís Goveia Leite, haklaken liuhusi omilia iha Igreja Nunbei-Oekusi, ohin.
Notísia relevante:Domingu Ramus lori mensajen dame-justisa-dame ba ema hotu
Domingu Ramus ida-ne’e, Amu esplika hahú tama semana santa, ne’ebé sarani sira rona Jesus Kristu nia paixão no terus, ida-ne’e la’ós hanesan istória ida-ne’ebé uluk nian, maibé sai hanesan lalenok ida, atu sarani haree nia aan ho figura sira-ne’ebé mosu hanesan Yudas Eskariotes, Santu Pedro no Pilatus.
“Dalabarak ita monu iha situasaun ida-ne’ebé defisíl, ita sai hanesan Pilatus ne’ebé fase liman, dalabarak mós ita fa’an valór sira-ne’ebé di’ak, fiar, kultura, bainhira ita infrenta situasaun defisíl, hanesan Yudas Escariotes, ne’ebé fa’an Jesus Kristo maske besik liu no sai hanesan eskolante ida, maibé hakarak haree de’it nia-aan, interese pesoál, no buka di’ak de’it ba aan-rasik, entaun nia faan Jesus tuir nia interese,” Amu afirma.
“Dalabarak mós ita sai hanesan Santu Pedro, iha situasaun defisíl, ita nega tiha ita-nia valór di’ak sira, nega ita-nia fiar tanba dalaruma osan, podér entaun ita nega bainhira iha situasaun defisíl hanesan eskolante Santu Pedro”.
Tanba ne’e, Amu selebrante ne’e husu ba sarani sira atu iha tempu semana santa ida-ne’e tenke hamutuk ho Jesus la’o, hahú husi han-kalan ikus ba too to’os Oliveira no hakarak hamutuk ho Jesus iha foho Kalvário.
“Nune’e, ita-bele selebra ita-nia páskua no selebra ita-nia vida, ita labele lori tan nia krúz hamutuk ho Jesus to’o Jerusalem depois hetan problema ita riba ita-nia krús iha Jerusalem, ita halai lakon, maibé hakarak kontinua hamutuk ho Jesus to’o foho Kalvário tutun, nune’e bele moris hi’as no selebra festa páskua ba ita-nia moris rasik,” katak Amu ne’e.
Notísia relevante:PM Xanana partisipa misa domingu ramus iha igreja Maria Imaculada Natarbora
Iha Domingu Ramus ne’e, Padre ne’e husu ba sarani sira hanoin Jesus nia terus ida-ne’e hodi haklaken fiar no hamatek halo jejún.
“Ita hakarak haklean ita-nia fiar tanba ne’e semana santa ida-ne’e, husu ba sarani sira atu hakmatek, halo jejún, labele halo barullu, ita hakarak hakmatek hanoin de’it Jesus Kristu nia terus, nune’e ita haklean ita-nia fiar ida-ne’e, hamutuk ho Kristo iha semana santa nia laran ne’e, hodi bele selebra festa moris hias ne’e nian”, Amu husu.
Notísia relevante:Domingu Ramus: Iha konfia, iha mós deskonfia
Iha biban hanesan, Agustinho Elo, nu’udar Sarani Katólika Oekusi, konsidera misa domingu Ramos importante tebes ba sarani atu halo reflesaun, oinsa banati tuir Jesus Kristu nia sakrifisíu sira-ne’ebé nia halo ba.
“Hodi salva ita-nia salan sira-ne’ebé ita halo iha mundu ne’e, tan ne’e ho semana santa ne’e, ita hotu espera katak lori nafatin domin no dame mai ita hotu,” nia afirma.
Jornalista: Abilio Elo Nini
Editór: Florencio Miranda Ximenes
