DILI, 07 Abríl 2026 (TATOLI)—Observadór ba modalidade Boxe iha Timor-Leste, Joel Maria Pereira, hateten atu hadi’a desportu iha Timor-Leste ne’e ezekutivu sira tenke muda pensamentu hodi halo jestaun ne’ebé di’ak, nune’e bele transforma Boxe hanesan industria.
Notísia Relevante: Boxista Delio derrota ho TKO iha Austrália
“Governu no setór privadu tenke servisu hamutuk oinsá mak transforma Boxe hanesan indústria ida, ida-ne bele hadi’a mós ita-nia ekonomia,” Joel hateten liuhusi programa entrevista eskluziva ne’ebé Tatoli hala’o iha Faról, tersa ne’e.
Nia dehan, bainhira modaliade Boxe tama ona hanesan indústria apoiu mós ekonomia nasaun nian.
“Bainhira Boxe sai ona hanesan indústria, ita hetan ona Boxista di’ak ruma, hanesan Many Paquião, ba joga iha li’ur kontratu osan hira mak sira lori mai ita-nia nasaun, ne’e ezemplu badak ida. Ita tenke dezenvolve ita-nia Boxista sira, kria eventu barak atu nune’e jogu sempre iha hela de’it,” nia dehan.
Iha okaziaun ne’e. nia mós husu ba setór privadu sira tenke iha inisiativa atu tau mós osan ruma hodi hamoris atividade Boxe.
“Empreza lokál sira, sempre hetan projetu husi Governu, hetan benefisiu lubuk ida, nusa la tau osan uitoan-uitoan hodi realiza atividade sira hanesan Boxe, bele hasai osan maibé ita jere di’ak osan sei tama fali husi billete sira no hasa’e mós atleta sira-nia prestasaun. Ita labele patokan de’it ba ativiade sira hanesan Sea Games, Asian Games no seluk tan,” nia hateten.
Nia hatutan, atu dezenvolve setór desportu Iha Timor-Leste tenke promove polítika hodi hasa’e kualidade desportu di’ak liután.
“Atu hadi’a desportu iha nasaun ne’e, muda ona polítika no pensamentu hodi Jere desportu iha rai-laran. Keta haluha ita iha modalidade amadora no modalidade profisionál ne’ebé sai hanesan indústria ba Iha dezenvolvimentu ekonomia husi parte desportu nian,” Joel hateten.
Iha parte seluk portavóz Asosiasaun Profesionál Boxe Timor-Leste, Aniceto do Rosário, hateten presiza parte hotu servisu hamutuk hodi lori modalidade Boxe ba oin.
“Ita tama ona Iha mundu profisionál ne’e ita tenke promove ita-nia Boxsista sira hodi sai hanesan promotor. Maibé ita tenki fila-fali ba ema hotu-hotu nia vontade, maibé ita sai hanesan amadora ita tenke haforsa sai hanesan profisionál iha Futuru,” nia dehan.
Nia subloña, kona-ba desportu iha futuru tenke tau preoridade liuliu iha Boxsista sira atu nune’e provome sai hanesan ema-ne’ebé profisional di’ak liután.
Jornalista : Hortêncio Sanchez
Editór : Cancio Ximenes
