DILI, 13 Abríl 2026 (TATOLI)—Unidade Polísia Marrítima (UPM) sei halo koordenasaun ho Komponente Navál hodi halo intervensaun ba operasaun ró peska ilegál iha Tasi Timor.
“Mesmu ho limitasaun iha ami-nia rekursu, maibé ami nafatin mantein hodi hala’o atividade operasaun no ami sei koordena ho parseiru Komponente Navál oinsá atu ami bele responde ba situasaun sira ne’e, tamba ami lokaliza muito bem ho serbisu koordenada ne’ebé mak iha, ami buka atu akompaña nafatin atividade sira hotu,” Komandante UPM, Superintendente Xefe Polísia, Eugénio Pereira hato’o ba Jornalista sira iha Seonál Lesidere, Segunda ne’e.
Antes ne’e, ekipa Ofisiál Ligasaun ho Peska husi Empreza ENI ne’ebé akompaña ró peskiza, bainhira halo atividade iha tasi-laran, identifika iha ró peska ilegál hamutuk hitu husi Indonézia halo peska ilegál iha Tasi Timor, iha área Vikeke.
“UPM liuhusi Servisu Sesaun Komandu Kontrolu simu informasaun husi sidadaun timoroan ida ho naran Galiano Waidau, ne’ebé serbisu hanesan survey rikusoin Timor, lansa informasaun ró peska ilegál tama iha iha parte Súl nian. Komandu UPM konsiente ho situasaun ne’e no tau kedan konsiderasaun,” nia akresenta.
Notisia relevante : Ró ilegál hitu halo peska iha Tasi Timor área Vikeke
Aleinde ne’e, UPM mós deteta ró peska ilegál ida halo atividade iha Tasi Timor-Leste.
“Liuhusi serbisu kordenada UPM, identifika lokál ró peska ilegál, nune’e lokaliza kedas ba fatin refere. Ró peska ilegál ne’e nia pozisaun iha parte sudeste ho nia lokalizasaun koordenada iha parte Súl ho nia númeru distánsia kilómetru 172, ne’ebé ita haree distánsia dook husi ita-nia illa rai-maran parte Súl,” Eugénio Pereira, katak.
Kazu ne’e UPM indentifika maibé seidauk atu fízikamente iha terrenu tanba ró peska ilegál nia distánsia dook, nune’e presiza iha planu di’ak tuir rekursu ne’ebé iha.
“Ita iha posibilidade atubele halo atuasaun tanba iha nia sistema ho lojístika atu nune’e ita labele hamosu risku tanba ita-nia membru efetivu sei hala’o nia atividade operasaun,” Komandante tenik.
Nia dehan, UPM ho ró speed boot ida iha Postu Leste hanesan iha área Com, Postu Administrativu Lautein, Munisípiu Lautein mak sei haree ró ilegál ne’ebé tama iha área leste, nune’e ho lansamentu rápida no efetivu iha posibilidade atu responde atividade ilegál.
“Ita mós iha koordenasaun ho parte Komponente Navál hodi bele halo operasaun konjunta ba lokalizasaun ró peska ilegál sira ne’e,” nia tenik.
Komandante informa, membru UPM sira ne’ebé halo operasaun iha mós risku, tanba ne’e la’ós iha rai-maran, maibé zona marrítima ne’e presiza kondisaun di’ak atubele sustenta membru hodi nune’e operasaun bele la’o ho di’ak.
Jornalista : Natalino Costa
Editora : Julia Chatarina
