BOBONARU,16 Abríl 2026 (TATOLI)- Servisu Rejistu Verifikasaun Emprezariál (SERVE) Sukursál Munisípiu Bobonaru iha trimestre dahuluk tinan 2026 halibur osan $4,643 ba kofre estadu.
Koordenadór SERVE sukursál Munisípiu Bobonaru, Leopoldo Pereirra Fernandes, konfirma reseitas hirak ne’e halibur husi kliente hamutuk 237 ne’ebé halo renovasaun dokumentu sira hanesan sertidaun rejistu komersiál, reimprime sertidaun rejistu komersiál, pedidu rejistu foun no renovasaun ba ezersísiu atividade ekonómika neʼebé sujeita atu hetan lisensa setoriál selu taxa $60 kada atividade tuir Dekretu-lei númeru: 83/22, loron 23 Novembru.
Aleinde ne’e, rekolla mós husi empreza sira neʼebé halo alterasaun objetu, aumenta atividade, alterasaun sede, administradór, órgaun sosiál, kapitál sosiál no seluk tan.
Notísia Relevante:SERVE Bobonaru halibur reseita $4.864 iha trimestre daruak 2025
“Janeiru reseitas tama iha $1,462, Fevreiru $2,374, marsu $807, ho nune’e totál $4,643,” nia informa ba Tatoli, iha kna’ar-fatin, Kinta ne’e.
Koordenadór ne’e afirma reseitas iha trismestre dahuluk ne’e, periodu fulan marsu nia menus kompara ho fulan jeneiru no fevereiru.
“Mezmu númeru rejistu fulan marsu ema na’in 79 mai nia reseitas tun fali, ida ne’e ita bele nota katak periodu marsu ne’e ita nia kliente sira halo pedidu rejistu ba lisensa setorál ne’e menus, entaun implika mòs ba reseitas. Maibé atu dehan de’it katak númeru rejistu kontinua la’o estavél iha ne’e ita bele hatudu katak ekonomía lokál ativu tebes iha Munisípiu Bobonaru,” nia dehan.
Notísia Relevante:2020-2025, SERVE Bobonaru arrekada reseita $64.993,75 ba kofre Estadu
Relembra katak, iha 2020, SERVE Bobonaru rekolla reseita hamutuk $1.001, 2021 ($765.50), 2022 ($14.052), 2023 ($14.459,15), 2024 ($22.720) no tinan 2025 iha reseitas $18.909.
Enkuantu hahú husi 2013 to’o 2025, SERVE, I.P. munisípiu Bobonaru rejistu komersiál hamutuk 2.723.
Jornalista : Sergio da Cruz
Editora : Armandina Moniz
