DILI, 29 Abríl 2026 (TATOLI)—Diretora Administrasaun Finansa Lojistika no Aprovizionamentu iha Hospital Nasional Guido Valadares (HNGV), Silvia Izina Ximenes, informa iha trimestre dahuluk (Janeiru to’o Marsu) ne’e, Hospitál Nasionál Guido Valadares (HNGV) ezekuta ona Orsamentu Jerál Estadu (OJE) 2026 ne’ebé atnje ona 12% .
“Iha Janeiru to’o Marsu, HNGV nia ezekusaun iha trimestre dahuluk iha 12% no iha ezekuzaun ne’e fahe ba kategoria haat hanesan saláriu vensimentu, bens servisu, kapitál menór no kapitál dezenvolvimentu,” Silvia Izina Ximenes inform aba jornalista sira iha nia kna’ar fatin HNGV, Bidau, ohin.
Nia relata, iha saláriu vensimentu ne’e ezekuta ona 19%, bens servisu 8%, kapitál menór 0 no kapitál dezenvolvimentu 0.
“Iha ne’e, ha’u atu esklarese katak kapitál menor sei 0 tanba ami halo ona prosesu iha komitmentu nia laran, CPV ami komesa prosesa ona maibé seidauk tama iha obrigasaun. Agora, iha kapitál dezenvolvimentu mós ami prosesa ona CPV maibé obrigasaun no atuál seidauk,” nia dehan.
Nia subliña, kapitál menór ne’e HNGV halo ona komitmentu ba CPV ne’e ida mak atu kompra ekipamentu urjente, ida tan mak prosesu ona atu kompra ekipamentu mamografia, depois ida tan mak kompra ekipamentu AC no inklui sosa autoclaf iha sala operasaun nian.
“Agora iha kapital dezenvolimentu ne’e ami prosesu ona kona-ba reabilitasaun sala operasaun tanba ita hotu hatene katak foin lalais ami kompras ekipamentu sala operasaun nian hanesan lampu no kama sira, entaun banhira ita atu uza tenke halo reabilitasaun ba fatin,” nia hateten.
Entertantu, tuir dadus portál transperénsia ne’ebé TATOLI asesu katak husi Janeiru mai to’o 29 Abril 2026, husi orsamentu alokadu hamutuk $ 20,860,647.00 ne’e, ninia ezekusaun atinje ona 17,6% hanesan kompromisu sira $3.413.575,94, obrigasaun sira $23.304,62, atuál $3.646.278,97 no saldo $13.777.487,47.
Jornalista : Felicidade Ximenes
Editór : Cancio Ximenes
