BOBONARU, 07 Maiu 2026 (TATOLI)-Prezidente Autoridade Munisipál Bobonaru, Paulo Moniz Maia, hateten katak setór estratéjiku sira ne’ebé inklui iha Planu Asaun Anuál (PAA) 2027 fó prioridade ba dezenvolvimentu ekonomia, sosial, saúde, infraestrutura no turizmu atu hasa’e moris komunidade iha munisípiu ne’e.
Paulo Moniz Maia esplika katak prioridade boot iha setór ekonomia mak realiza estudu kona-ba posibilidade konstrusaun barrajen bee iha mota Bulobu. Projetu ne’e, tuir nia, bele fornese bee ba natar iha Maliana I ne’ebé to’o agora seidauk utiliza ho másimu.
Notísia relevante: Autoridade Bobonaro no parseiru dezenvolvimentu sira diskute programa prioridade iha suku
“BarRajen ne’e importante atu fortifika períodu kultivasaun no hasa’e produsaun hare no batar ba konsumu doméstiku. Aleinde ne’e, bele uza atu jenera eletrisidade, redús gastu Estadu ba eletrifikasaun nomós sai fatin turístiku atu atrai investimentu”, Paulo hateten iha salaun Maria Tapó, kinta ne’e, iha intervensaun ba konsulta publika nasionál ba elaborasaun OJE 2027.
Iha área agrikultura, autoridade munisipál mós planeia atu halo estudu pilotu kona-ba plantasaun masán ka apel iha suku Tapó, Oe-le, no área seluk iha postu administrativu Bobonaru. “Estudu ne’e atu haree karik projetu ne’e bele implementa ho susesu antes espande ba área seluk”, nia dehan.
Iha setór turizmu, autoridade munisipál aposta ba formasaun komunidade, hadi’a infraestrutura bázika hanesan estrada rurál no promove poténsia turístika iha munisípiu. Ida ne’ebé konsidera importante mak promosaun sítiu fósil iktiosauru iha foho Lesululi, Kailaku, atu atrai investidór no vizitante sira.
Ba setór sosiál, Governu sei fó prioridade ba edukasaun no formasaun liuhusi konstrusaun alojamentu, saladeaula ba pré-eskolár no ensinu báziku, inklui hadi’a refeitóriu no koziña eskolár atu tulun Programa Merenda Eskolár.
Aleinde ne’e, autoridade munisipál mós sei inviste ba formasaun ba joven no grupu vulneravel sira, liuhusi programa ekonomia feto, agrikultura no ortikultura atu sai parte husi dezenvolvimentu ekonomia lokal.
Iha área saúde, Paulo Moniz Maia hateten katak Governu munisipál sei alarga instalasaun saúde no mellora servisu ambulánsia atu garante atendimentu saúde primária ba komunidade.
Iha área infraestrutura, sei kontinua hadi’a estrada rurál, aumenta asesu ba bee-moos no saneamentu, no proteje bee-matan sira atu prevene problema bee maran. Dadus hatudu katak aldeia 17 iha Bobonaru seidauk asesu ba bee-moos.
Paulo Moniz Maia mós apresia Ministériu Obra Públika tanba konsege aumenta kobertura eletrifikasaun besik porsentu 95 iha munisípiu Bobonaru. “Falta aldeia rua ka tolu mak seidauk kobre. Espera katak tinan ida-ne’e bele kobre hotu”, nia dehan.
Planu prioridade sira ne’e reflete iha Planu Dezenvolvimentu Estratéjiku Munisipál 2026-2030 ne’ebé aliña ho Planu Estratéjiku Dezenvolvimentu Nasionál (PEDN), Objetivu Dezenvolvimentu Sustentavel (ODS) no Programa Governu.
Notísia relevante: OJE 2025 ba Bobonaro la sufisiente atu responde preokupasaun iha baze
Jornalista: Sergio da Cruz
Editora: Maria Auxiliadora
