iklan

EKONOMIA, BOBONARO, HEADLINE, MUNISÍPIU

Autoridade Bobonaro no parseiru dezenvolvimentu sira diskute programa prioridade iha suku

Autoridade Bobonaro no parseiru dezenvolvimentu sira diskute programa prioridade iha suku

Autoridade munisípiu Bobonaro halo enkontru ho parseiru dezenvolvimentu sira no Organizasaun Naun Governamentál (ONG) lokál sira. Imajen Tatoli/Sérgio da Cruz.

BOBONARO, 06 outubru 2022 (TATOLI) — Autoridade Munisípiu Bobonaro (AMB), sesta ne’e realiza enkontru ho Organizasaun Naun Governamentál (ONG) lokál no ajénsia hosi parseiru dezenvolvimentu sira, atu define área implementasaun no dezeña mapeamentu programa ne’ebé implementa iha suku sira.

Autoridade Bobonaro realiza enkontru bazea dekretu-lei 03/2016 ne’ebé altera ona ba dekretu-lei númeru 54/2020, 28 outububru kona-ba estatutu administrasaun munisipál no grupu tékniku interministeriál ba desentralizasaun administrative.

Sekretáriu autoridade munisípiu Bobonaro, João Fátima do Carmo, informa, enkontru ne’e realiza tanba dalabarak ajénsia internasionál lubuk ida sempre husu informasaun hosi autoridade munisípiu kona-bá programa sira-ne’ebé ONG sira implementa iha suku.

“Ita-nia objetivu enkontru ida ohin atu halo alíneamentu ba mapeamentu ba atvidade saida mak la’o iha munisípiu Bobonaro, atu nune’e governu no parseiru dezenvolvimentu sira bele lori objetivu di’ak ida ba ita-nia munisípiu, jeralmente ba ita-nia nasaun,” nia hateten iha salaun ekontru administrasaun Bobonaro.

João agradese ba parseiru nasionál no internasionál sira-ne’ebé dezde Timor-Leste ukun-aan nafatin iha komitmentu atu apoia povu Timor-Leste liuhosi implementasaun programa sira iha setór agrikultura, edukasaun, saúde no seluk tán.

“Ami (autoridade) nia esperansa maka ne’e, mai ita hamutuk hadi’ak buat sira-ne’ebé mak la di’ak hodi tulun ita-nia komunidade sira-ne’ebé maka daudaun ne’e la hetan oportunidade hanesan ita,” nia akresenta.

Diretora apoia ONG lokál iha munisípiu Bobonaro, Gizela Pires, reforsa durante ne’e autoridade munisípiu alista de’it programa ne’ebé ajénsia no ONG sira implementa, maibé teknikamente iha terrenu serbisu munisipál sira maka hatene liu.

Nia fó ezemplu, programa sira-ne’ebé ajénsia To’os ba Moris Diak (TOMAK) serbisu hamutuk ho diresaun servisu agrikultura munisípiu Bobonaro, liuliu estensionista sira atu kapasita no motiva agrikultór sira hasa’e produsaun agríkola.

“Ita-nia sorumutu ida-ne’e oinsá ita-boot sira atu define área implelentasaun programa, hosi autoridade atu prodús mapa ida, nune’e bainhira doadór sira osan na’in sira mai husu karik, ami labele naran sik tún sa’e de’it, maibé tenke iha dadus, ajénsia ida-ne’e nia área implementasaun ne’e iha suku ida,” nia subliña.

Gizela hatutan, diskuasaun ne’e mós atu identifika programa sira-ne’ebé parseiru dezenvolvimentu sira implementa iha postu no suku sira, nune’e bainhira ajénsia seluk mai atu implementa nia programa ruma, labele tama ona suku ne’ebé antes ne’e hetan ona oportunidade.

Ajénsia implementadór sira-ne’ebé partisipa iha eskontru ne’e mak hanesan Word Vision, UNDP, Word Food Programme (WFP) no ONG lokál sira-ne’ebé eziste iha munisípiu Bobonaro.

Jornalista   : Sérgio da Cruz

Editór         : Evaristo Soares Martins

iklan
iklan

Leave a Reply

iklan
error: Content is protected !!