DILI, 01 Juñu 2026 (TATOLI) – Partidu Kmanek Haburas Unidade Nasionál Timoroan (KHUNTO) lamenta ho lentidaun iha ezekusaun Programa Uma Dingu, tanba prosesu implementasaun programa ne’e la’o tarde tebes iha munisípiu sira.
Xefe Bankada KHUNTO, deputadu António Verdial de Sousa, ne’ebé rona povu nia halerik kona-ba uma dignu, liuliu iha munisípiu Bobonaru no munisípiu sira seluk, dehan to’o agora projetu ne’e seidauk hatudu progresu ne’ebé di’ak. Nune’e, nia husu ba Governu tenke fó klarifiksaun ruma, tanba osan ne’ebé uza ne’e povu nian.
Nia dehan munisípiu Bobonaru hetan projetu konstrusaun uma hamutuk 200, maibé nia ezekusaun foin atinje 28%, ki’ik liu kompara ho munisipiu sira seluk.
Deputadu ne’e esplika katak problema sira ne’ebé afeta ba prosesu sira la la’o tarde mak problema rai iha suku Lahomea no Ritabou, ne’ebé halo uma 15 paradu tinan rua, aleinde ne’e asesu ba estrada susar.
Iha suku Tapo-Memo, uma foin harii fulan neen, maibé kalen anin sobu, bee tama. Tanba ne’e, nia ezije ba Governu atu haree kestaun ne’e. Nia mós kestiona ho situasaun ne’e, to’o Dezembru 2026 uma hira mak sei entrega, liuliu ba postu Maliana.
“Se Governu la konsege garante ida-ne’e lalika husu tan osan, tanba osan povu nia la’ós atu halo esperimentu”, afirma.
Nia husu mós ba Ministériu Obra Públika, liuhusi Ajénsia Dezenvolvimentu Nasionál (ADN) tenke halo auditoria téknika molok halo pagamentu no halo relatóriu klaru ba Parlamentu Nasionál.
Vise-Ministru ba Asuntu Parlamentár, Adérito Hugo, dehan iha implementasaun projetu Uma Dignu balun enfrenta difikuldade hanesan iha Maliana no Lospalos no ministériu kompetente hamutuk ho kompañia sei rezolve problema ne’e.
Iha biban ne’e, Primeiru-Ministru, Xanana Gusmão, relata dadus kona-ba progresu serbisu Uma Dignu nian hahú husi 2024 to’o agora hodi responde pergunta husi deputadu sira.
Xefe Governu relata katak projetu Uma Dignu iha Manatutu iha unidade 25, ne’ebé konstrui husi 2024 no nia progresu atinje 70%, Manufahi-Fauteberliu iha 25 no atinje 93%, Lautein-Muapitine 15 no atinje 52%, Ermera- Riheu 15 (30%) no Kamaelpun 10 (11%), Bobonaru-Tunu-Bibi 25 (49%) Ainaru 13 (14%). “Ida-ne’e reapropriasaun tanba la’ós fásil atu halo kedas”, dehan.
Jornalista: Arminda Fonseca
Editora: Maria Auxiliadora
