BOBONARU, 01 Juñu 2026 (TATOLI) – Alunu sira husi Sentru Aprendizajen no Formasaun Eskolár (CAFE) Maliana no Eskola Bázika Filiál (EBF) Holsa no komunidade lokál selebra Loron Internasionál Labarik ho atividade oioin ne’ebé promove alegria, solidariedade no aprendizajen hamutuk iha ambiente ida ne’ebé livre husi diskriminasaun.
Koordenadora Eskola CAFE Maliana, Martinha Cesarina da Costa Soares, hateten katak komemorasaun ne’e la’ós atividade foun, tanba kada tinan eskola sempre organiza programa hanesan atu marka loron importante ba labarik sira.
Antes hahú atividade sira, CAFÉ hala’o uluk serimónia hasa’e bandeira no jogu edukativu oioin hanesan halai-karon, korrida, halai-berlindus no seluk tan.
“Ami fó oportunidade ba labarik sira atu hili livremente atividade ne’ebé sira hakarak partisipa” Martinha dehan iha kampu futeból Holsa, segunda-feira ne’e.
Tuir nia, atividade sira ne’e la’o atu ajuda labarik sira aprende moris hamutuk, respeita malu no hadook diskriminasaun entre ema ida ho ema seluk, independentemente husi eskola ka grupu ne’ebé sira iha.
Loron Internasionál Labarik importante tebes tanba sai momentu ida atu valoriza direitu no papél labarik sira nian iha sosiedade. “Espera katak iha futuru labarik sira bele kontinua halo atividade ho livremente no moris iha ambiente ne’ebé saudavel no nakonu ho pás”, nia dehan
Estudante Adélia Vila Nova kontente tanba bele selebra hamutuk loron ne’ebé konsidera importante ba labarik sira. “Tanba ami mak futuru rai ida-ne’e no sei kontinua dezenvolve nasaun ba oin”, realsa.
Iha oportunidade hanesan, Sekretáriu Autoridade Munisípiu Bobonaru ba Asuntu Sosiál no Organizasaun Komunitária, Júlio Carvalho Caero, agradese ba atensaun ne’ebé Governu no entidade relevante sira fó ba bem-estar labarik sira, liuhusi edukasaun no saúde.
Nia esplika katak governu no Autoridade Munisípiu Bobonaru kontinua halo esforsu atu hadi’ak kondisaun moris labarik sira, inklui kombate má nutrisaun ne’ebé sei sai dezafiu ida iha Bobonaru.
Tanba ne’e, Programa Merenda Eskolár sai medida importante atu melhora nutrisaun ba estudante sira. Aleinde ne’e, edukasaun nu’udar direitu no devér sidadaun nian. Nune’e, importante atu prepara labarik sira sai jerasaun ne’ebé iha koñesimentu no responsabilidade iha futuru.
“Espera katak komemorasaun hanesan ne’e bele motiva labarik sira atu aumenta sira-nia koñesimentu no prepara-an ba responsabilidade sira iha aban-bainrua kuandu sira boot ona”, dehan.
Komemorasaun Loron Internasionál Labarik iha Maliana termina ho atmosfera alegre, ho labarik sira partisipa ativamente iha jogu no atividade edukativa sira ne’ebé promove amizade, unidade no respeitu ba malu.
Jornalista: Sergio da Cruz
Editora: Maria Auxiliadora
