BAUKAU, 03 Juñu 2026 (TATOLI)—Sarani Diozese Baukau sente lakon ho falesimentu Padre Agostinho da Costa iha Dioseze Baukau ho idade 84.
Bispu Dioseze Baukau, Don Leandro Maria Alves esplika, Maktoban Padre Agostinho da Costa hakotu iis iha Ospitál Rejionál Eduardo Ximenes (HoREX-sigla portugeza) iha Kuarta ne’e purvolta dadeer tuku 06:00 Otl hafoin horisehik atake fuan bazeia ba diagnóstika ospitál nian no tanba fatór idade.
“Ida-ne’e tristeza ida ba Dioseze Baukau liuliu sarani Timor-Leste tanba lakon bibi-atan di’ak ida-ne’ebé mak sai sasin ba fiar hodi haklaken Na’i-Maromak ba ema hotu,” Bispu Dioseze Baukau Don Leandro Alves hateten iha ninia kna’ar fatin, Vila Antiga, Kuarta ne’e.
Líder Katólika ne’e relata reuniaun Kuria Diozese Baukau deside Maktoban Padre Agostinho da Costa sei haloot iha semitériu dioseze iha Parokia São José Vila Nova hafoin ramata misa requiem iha Igreja Katedrál Vila Antiga, Sesta (05/06/2026) tuku 10:00 Otl.
Don Leandro Alves husu sarani sira liuliu Dioseze Baukau atu hasa’e orasaun liuhusi reza ba Na’i-Maromak hodi perdua no simu Padre Agostinho da Costa iha Nia Kandunan Santu.
“Ita agradese ba Na’i-Maromak tanba fó nia bibi-atan ne’e ba ita, agora bolu hikas ona. Tanba ne’e kontinua reza atu fini ne’ebé namkari durante maktoban nia vida bele buras liután,” Bispu akresenta.
Tuir observasaun TATOLI iha terrenu nota, kadaver Padre Agostinho da Costa hatoba iha rezidénsia privada iha-ne’ebé sei vizita husi família antes tranzlada hodi hala’o prosesu fúnebre.
Entretantu, Padre Agostinho da Costa, oan ba dalimak husi maun-alin na’in-ualu ne’e simu ordenasaun nu’udár saserdote iha loron-22 Agostu 1971. Atuál Padre Kapelaun Horex Baukau ne’e moris iha Baukau, 10 Maiu 1942, husi aman José da Costa no inan Maria Jacinta da Costa.
Biográfia Padre Agostinho
Padre Agostinho da Costa, moris iha Boilekumu, Baukau, loron-10 Maiu 1942, Oan ba dalimak husi aman José da Costa no inan Maria Jacinta da Costa.
Pe. Agostinho da Costa sai na’in-lulik bainhira simu ordenasaun saserdotál iha loron-22 Agostu 1971, iha Katerál Lei Bigos, Dominon husi Pinho Brandon no simu sakrementu batizmu husi Padre Diogo Avé Maria d’Almeida iha Igreja Baukau iha Londres iha loron 13 fulan-Juñu tinan 1948.
Nivél edukasaun
Maktoban Padre Agostinho da Costa hahú estudu iha Eskola Misaun Baukau iha Koléjiu Santa Teresinha Ossú, no hanesan estudante iha Semináriu Menór Dare iha tinan 1957.
Kontinua estudu iha Makau, iha Semináriu São José, husi tinan 1957 to’o 1966 no kontinua estuda iha Timor iha Koléjiu São Francisco Xavier Dare no mós kontinua hala’o estuda Teolojia iha Semináriu Maiór Leiria husi tinan 1967 to’o 1971.
Karreira nu’udár Saserdote
Padre Agostinho da Costa halo apostoladu iha Misaun Manatuto nu’udár vigáriu koadjutór husi tinan 1972 to’o 1974, iha tinan 1974 to’o 1979 kontinua asume nu’udar Pároku iha Igreja Bekora, Dili.
Aleinde ne’e, nu’udár Superiór Misaun Manatuto nian husi tinan 1979 to’o 1990. Ho Dekretu Nú. 8/1997, loron-04 Agustu 1997, nia hetan libertasaun husi ninia kna’ar nu’udár Padre Pároku Parókia Same nian.
Fundadór Dioseze Baukau ne’e, durante ne’e nu’udár Amu-lulik nunka serbisu iha Dioseze Baukau no to’o hakotu-iis asume nu’udar ministra iha Parókia Iliomar no serbí ema moras sira nu’udár kapelaun iha Ospitál Referrál Baukau ne’ebé antes ne’e maktoban pertense ba Kleru Dili nian, nu’udár membru Konsellu Presbiterál.
Jornalista: Natalino Belo
Editór: Xisto Freitas da Piedade
