OEKUSI, 03 Juñu 2026 (TATOLI) – Xefe Suku Lalisuk, Hermenegildo Lalisuk, lamenta ho dezisaun Autoridade Rejiaun Administrativa Espesiál Oekusi Ambeno (RAEOA), liuhusi Diresaun Rejionál Agrikultura, tanba termina ona kontratu ba funsionáriu tratorista sira na’in-13, ne’ebé serbisu tinan barak ona hahú kedas iha 2010 to’o ohin loron.
Notísia relevante:Posibilidade, Kontratu Funsionáriu 1.500-resin iha RAEOA sei “hapara”
Tanba ne’e Autoridade Lokál ne’e, rekomenda ba Autoridade RAEOA, presiza konsidera tratorista sira, tanba daudaun ne’e agrikultór sira hein hela atu fila rai iha natar no to’os inklui ko’a haree, maibé tratorista laiha atu utiliza mákina hirak-ne’e.
“Ita-nia alin sira mai hasoru ona ha’u, sira na’in-13, tanba serbisu kle’ur tebes, husi kedas 2010, momentu ne’ebá mós sira tuir prosesu teste konkursu públiku mak tama serbisu, la’ós nomeasaun polítika. Agora ha’u-nia preokupasaun rekomenda ba Autoridade RAEOA liliu agrikultura, haree tau matan nafatin ba tratorista sira,” nia hateten iha sede suku Lalisuk, ohin.
Líder komunitáriu ne’e informa, antes ne’e, autoridade lokál ne’e submete ona pedidu ba Prezidente Autoridade RAEOA ho kedas naran tratorista sira na’in-13 atu tau matan ba sira, tanba tinan barak serbisu iha sentru agrikultura Aenmat responsabiliza másimu ba tratór sira.
“Ha’u hanesan xefe suku, sente laran-moras, tratorista 13 ne’e, la’ós husi suku Lalisuk de’it, maibé balu mai husi Pássabe, Oésilo Nítibe inklui Pante Makasar rasik, sira-nia fatin serbisu iha sentru Aenmat, komunidade Lalisuk mak fó, atu tau matan ba natar sira, maibé agora atu hapara sira ona, entaun ita sei ko’alia ho komunidade razaun saida mak hapara sira, depois hatama fali ema foun, la liu husi konkursu públiku maibé bolu malu de’it,” nia preokupa
Notísia relevante:Funsionáriu kazuál iha Oekusi seidauk simu saláriu, PA RAEOA garante sei solusiona
Autoridade lokál fó razaun atu mantein tratorista sira, tanba dadaun ne’e Governu apoia ona mákina ko’a haree, tratós fila rai 15 maka hala’o operasaun ba agrikultór sira-nia natar no to’os, mákina kuda haree mós iha ona sentru agrikultura Aenmat inklui tratór ki’ik no bo’ot.
“Agora tratorista ita hasai, semak uza fali sasán sira-ne’e, haa’u triste tanba sira serbisu tinan 16 ona, maka agora atu hasai sira, ita-nia laran tau iha ne’ebé, sira-nia saláriu kada fulan $204 de’it atu atende nesesidade família, ne’e maka ha’u-nia laran moras kuandu hasai sira, maibé ha’u sei mobiliza komunidade sira atu taka provizória sentru ne’e, tanba rai ne’e komunidade nian, mak fó ba Agrikultura atu utiliza atende natar no to’os iha Oekusi,” nia promete.
“Ne’ebé ha’u ejize nafatin, sé ha’u ko’alia maka Autoridade RAEOA la responde, ha’u la promete maibé ha’u sei hamutuk ho natar na’in-sira taka provizória sentru agrikultura Aenmat, rezolve lai alin tratorista sira maka foin bele utiliza fali sentru ne’e,” nia hateten.
Tanba tuir autoridade ne’e, natar na’in-sira, agora hein hela atu utiliza mákina sira hodi dulas hare, balun atu halai natar faze daruak nian iha natar Oélu ho Tetumnanu, maibé bainhira ba husu tratorista sira, dehan agora kontratu laiha ona tanba husi Diresaun Agrikultura hasai ona sira husi serbisu.
“Pedidu ha’u asina 10-resin ona, ita-nia agrikultór husu atu apoia tratór no mákina, maibé karta ne’e ha’u hatama ba Agrikultura, besik semana tolu ona, seidauk iha responde, entaun sasán sira-nee’bé Governu tau ona, atu utiliza ka ou rai de’it iha sentru ne’e, agora komunidade atu presiza, sira mós selu no prepara gazoliña,” nia hateten.
Notísia relevante:Funsionáriu EDTL Oekusi 50-resin seidauk selebra kontratu, posibilidade iha tempu-badak
Hatan ba rekomendasaun ne’e, Diretór Rejionál Serbisu Agrikultura Oekusi, José Oqui, hateten, antes ne’e reuniaun Autoridade RAEOA, hasai ona desizaun ona kona-ba forsa traballu sira iha diresaun idak-idak, no desizaun ikus maka diresaun tolu maka prioridade atu kontinua hanesan saúde, edukasaun no EDTL, enkuantu, diresaun seluk atribui ona notifikasaun katak, kontratu tenke termina iha loron 31 Marsu 2026.
“Diresaun seluk inklui agrikultura la’ós prioridade, ne’e mak foin lalais iha desizaun atu hatama fali, kada diresaun ida hatama de’it na’in-20 mak kontratu fali atu kontratu fali hodi kontinua serbisu, maibé ho tempu fulan-tolu de’it, karik ba oin presiza mak kontratu tan, tanba antes ne’e funsionáriu agrikultura simu notifikasaun hamutuk na’in-142, agora presiza de’it na’in-20,” nia hateten.
Maibé nia dehan, kona-ba tratorista sira, sei konsidera maibé sei akontese iha fulan Outubru no Novembru tanba serbisu máksimál ona, entaun Diresaun Rejionál Agrikultura sei bolu atu kontinua tan serbisu.
“Agora sira na’in-20 atu kontratu ne’e, prioridade ba tékniku estensinista na’in-sia, na’in-neen ba insiminatór tanba ne’e programadu ona serbisu tenki la’o, ida mak ba tékniku engeneiru atu apoia ba projetu agrikultura sira hanesan irigasaun, atu prepara dezeñu, BoQ inklui rekolla dadus, no na’in-rua ba kondutór, ne’e mak na’in-20 atu kontratu fali, agora proposta hato’o ona iha Prezidente Autoridade RAEOA, kuandu aprova ona, mak foin selebra kontratu ho sira na’in-20 ne’e,” nia hateten.
Notísia relevante:Última hora: PDHJ hein hela Diretór José Oqui hodi averigua prosesu fornesimentu karau
Jornalista: Abílio Elo Nini
Editór: Rafael Ximenes de A. Belo
