DILI, 04 Juñu 2026 (TATOLI)—Governu liuhusi Ministériu Obra Públika (MOP) selebra kontratu ho empreza manán-na’in ba projetu Road for Development (R4D) estrada rurál hamutuk-16 iha munisípiu Vikeke no Manufahi.
Notísia Relevante: MOP selebra kontratu ho empreza manán-na’in reabilita estrada rurál iha munisípiu
Ministru Obra Públikas, Samuel Marçal, hateten ohin loron ita asina tan kontratu ba kompañia 16 hodi implementa projetu R4D iha munisípiu rua (2 mak hanesan Vikeke iha pakote ualu (8) no Manufahi iha pakote ualu (8), tanba tuir orientasaun husi Primeiru-Ministru nian fó prioridade liu ba estrda rurál.
“Ida-ne’e bele fasilita komunidade iha área rurál halo movimentasaun ba-mai, bele asesu ba eskola, ospitál no merkadu liuliu lori sira-nia produtu lokál ba faan iha merkadu,” Ministru Samuel relata ba jornalista sira iha nia kna’ar fatin, Kaikoli, ohin.
Ho nune’e, governante ne’e apela ba kompañia manán-na’in sira atu aselera projetu ida ho lalais tuir kontratu ne’ebé iha maibé tenke garante ninia kualidade, tanba la’ós atu konklui hotu kedas iha tinan ida-ne’e nia laran maibé tuir kapasidade Governu nian tenke halo neineik.
“Komunidade iha área rurál presiza liu mak eletrisidade, bee-moos no estrada, entaun parte eletrisidade nian iha faze tuir mai ita sei asina tan pakote 20,” nia dehan.
Nia hatutan, iha projetu ida kompañia balun kaer projetu rua (2) ba leten, tanba ne’e sira apela ona ba kompañia sira atu servisu ho kompromisu no aselera ho di’ak labele hanaruk projetu sira-ne’ebé Governu fó.
“Entaun, ohin, kompañia sira asina ona kontratu sira sei kontinua kedas implementa to’o durasaun tinan ida,” nia hateten.
Iha biban ne’e, Diretór Ezekutivu Kompañia Bere is Back, Luis Bernardo Gamboa, hato’o agradesimentu ba Governu tanba bele fó ona oportunidade ba sira asina kontratu ba projetu reabilitasaun estrada rurál.
“Ba ha’u-nia parte sei implementa iha munisípiu Vikeke no prontu ezekuta servisu tuir kontratu ne’ebé iha,” Diretór ne’e ne’e dehan.
Jerente ne’e mós garante sei implementa ho kualidade, maske nia ka’er projetu rua )2) maibé ida-ne’e lasai problema ba nia, tanba nia iha ekipamentu ne’ebé kompletu atu halo servisu iha trerenu.
“Ha’u mós atu ko’alia de’it katak ema barak mak kestiona ha’u-nia kompañia ho Bandidu Qualidade, maibé ida-ne’e laiha relasaun ho konkursu públiku ida-ne’e, tanba prosesu aprovizionamentu ne’e la’o tuir dalan legal. Entaun, hanesan sidadaun iha direitu atu compete,” nia afirma.
Enkuantu projetu reabilitasaun estrada rurál pakote 16 ne’e implemenya husi kompañ Alifa Pereira Unip, Lda, JV Lecha Lyan Pacific Unip, Lda, Halta Diak Unip, Lda, Afifra Unip, Lda, CA10 Rakama Unip, Lda, Sayfiyande Unip, Lda, Chelmer Unip, Lda, Edzores83 JP, Unip, Lda, Lekduadyti Unip, Lda, Limfim Dargima Unip, Lda, King-Gamboa Unip, Lda, Bere is Back, Unip, Lda, Ema Horacio Unip, Lda, Resikou9405, Unip, Lda, Metaqueli Unip, Lda, Seiti Nabilan 28 Unip, Lda, Brother Mean Unip, Lda ho montante orsamentu hamutuk millaun $9-resin.
Jornalista : Alexandra da Costa
Editór : Cancio Ximenes
