BAUKAU, 04 Juñu 2026 (TATOLI)—Autoridade suku tinan-ne’e sei prioriza reabilita estrada iha Suku Ueru-mata, Postu Administrativu Laga liuhusi, Munisípiu Baukau, atividade regulár Programa Nasionál Dezenvolvimentu Suku (PNDS).
Xefe Suku Ueru-mata, Sabino Martins, esplika, estrada sai prioridade inportánsia tanba kondisaun ne’ebé presiza tau-atensaun ho obejetivu halo konesaun entre komunidade inklui transporta produtu ba merkadu.
“Ami ramata ona kuotasaun no tuir planu semana-ne’e hahú ona obra,” Sabino Martins hateten iha Aldeia Ueru-mata, Kinta ne’e.
Sabino Martins relata reabilitasaun estrada referida ho tipu cor beton iha pontu risku sira ho totál kilómetru ida iha-ne’ebé hahú husi Sede Aldeia Ueru-mata ba Suku Saelari ho distánsia kilómetru sia-resin ho alokasaun orsamentu hamutuk rihun $30-resin.
Aleinde ne’e, estrada referida sei reabilita to’o komunidade Ueru-mata ne’ebé hela iha baliza Saelari ho totál uma-na’in 37 no fasilita mós movimentu komunidade husi aldeia balun iha Saelari.
“Ida-ne’e estrada aternativa bainhira atu ba suku no Postu Baguia,” Sabino Martins subliña.
Entretantu, Suku Ueru-mata kompostu husi Aldeia Ueru-mata ho totál komunidade 821 husi uma-kain 217.
Jornalista: Natalino Belo
Editór: Xisto Freitas da Piedade
