DILI, 24 Juñu 2026 (TATOLI)–Sekretáriu Estadu Veteranu, Cesar dos Santos da Silva “Merak” informa sei haloot Antigu Prezidente Repúblika, Francisco Guterres “Lú Olo”, entre Proklamadór Francisco Xavier do Amaral no Saudozu Ma’huno iha Jardín Eroi Metinaru.
Merak hateten serimónia fúnebre ba saudozu sei realiza iha 26 Juñu 2026, ho sekuénsia atividade ne’ebé prepara ona antes selebrasaun ofisiál.
Nia esplika katak bainrua dadeer loron serimónia nian, korpu saudozu sei lori husi rezidénsia ba Sede Komité Sentrál FRETILIN, depoiz kontinua ba Kuartél Jenerál F-FDTL iha Fatuhada.
“Hafoin ramata vizita ba instituisaun sira ne’e, korpu sei lori bá Jardín Eroi Metinaru, fatin ne’ebé prepara ona atu haloot saudozu nia kampa besik kampa Avó Ma’huno no Avó Xavier nian iha Metinaru,” nia dehan ba jornalista sira iha Faról, Kuarta ne’e.
Selebrasaun missa fúnebre sei hala’o iha Igreja Katedrál Dili, tuku 11:00 Otl iha Sesta (26/06). Hafoin ramata vizita ba instituisaun relevante sira, korpu sei lori ba Katedrál atu partisipa misa no presta omenajen ikus.
Tuir Merak atividade presta omenajen sei kontinua to’o 25 Juñu 2026 no komisaun organizadora husu ba ema hotu-hotu atu respeita regra no prosedimentu ne’ebé estabelese ona.
“Ami orienta hela ema hotu-hotu ne’ebé mai atu tuir regra sira-ne’ebé ami estabelese ona nune’e serimónia ne’e bele lao ho di’ak no ordenadu,” nia dehan.
Nia mós hateten katak atividade omenajen hahú ona iha loron 23 Juñu 2026, tuku 13:00 OTL, ho prezensa husi instituisaun Estadu sira iha Dili.
Relasiona ho posibilidade prezensa Primeiru-Ministru, Xanana Gusmão no membru Governu sira iha serimónia fúnebre, Merak dehan katak to’o agora seidauk iha konfirmasaun ofisiál tanba Primeiru-Ministru hala’o hela vizita ofisiál ba rai-li’ur.
“Ha’u seidauk bele fó informasaun loloos tanba Primeiru-Ministru iha hela vizita ofisiál ba rai-li’ur. Tanba ne’e, ami seidauk bele fó resposta definitiva kona-ba sira-nia prezensa iha serimónia fúnebre ne’e,” nia esplika.
Iha parte seluk, Primeiru-Ministru Interinu, Mariano Assanami Sabino, deklara katak sei haloot Saudozu Lú Olo iha fatin level aas liu iha Saudozu José Antonio da Costa “Ma’Huno nia sorin.
“Tanbasá maka aas, tanba razaun forte maka respeitu iha nia prosesu hotu iha gerrilleiru iha ai-laran no ikus hanesan Prezidente Asembleia Konstituinte, hakerek Konstituisaun, aprova Konstituisaun ne’ebé sei la akontese tan bá-oin, dala ida de’it sei la repete tan,” nia esplika.
Jornalista: Osória Marques
Editór: Xisto Freitas da Piedade
