DILI, 22 Jullu 2026 (TATOLI)–Tribunál Judisiál Primeira Instánsia Dili (TJPID), Kuarta ne’e, liuhusi interrogatóriu dahuluk deside hodi hatún despaisu hodi aplika medida Termu Identidade no Rezidénsia (TIR), aprezentasaun períodika, kausaun $10.000 ba arguidu ida nu’udar Jerente ba atividade scam call center iha área Bedois.
Polísia Nasionál Timor-Leste (PNTL) liuhusi Diresaun Servisu Investigasaun Kriminál (DNIK) asegura no detein sidadaun estranjeiru na’in-hitu, iha Domingu (19/07) foin lalais ne’e, iha área Bedois, Suku Bekora, Postu Administrativu Kristu Rei, Munisípiu Dili.
Notísia relevante : Ekipa konjunta desmantela rede “Scaming Call Center” iha Bedois no asegura sidadaun estrajeiru na’in-hitu
Iha interrogatóriu dahuluk, Juíz Rozito Guterres halo uluk identifikasaun ba arguidu na’in-hitu no iha prosesu ne’e sira hili direitu nonok.
Nune’e, ikus mai Tribunál deside hodi aplika medida koasaun TIR, aprezentasaun períodika, proibisaun auzénsia no kausaun $10.000 ba arguidu CL nu’udar Jerente, enkuantu arguidu neen seluk aplika medida koasaun TIR, aprezentasaun períodika, proibisaun auzénsia no medida kausaun $2.000.
Antes ne’e, iha Ministériu Públiku nia alegasaun, reprezenta Prokuradór Titulár, Rafael Gusmão no João Marquez, husu Tribunál atu aplika medida koasaun aprezentasaun períodika ba arguidu na’in-hitu, medida proibisaun auzénsia no medida kausaun $5.000 ba kada arguidu.
Jornalista : Natalino Costa
Editora : Julia Chatarina
