DILI, 19 Jullu 2026 (TATOLI)- Ekipa Konjuta ne’ebé kompostu husi Polísia Nasionál Timor-Leste (PNTL) Diresaun Servisu Investigasaun Kriminál hamutuk ho Servisu Migrsaun no Servisu Informasaun Polìsia, domingu (19/7) tuku 01:00, madrugda ne’e halo operasaun iha area Bedois, Suku Bekora, Postu Administrativu Kristu Rei konsege deteta uma ida ne’ebé sidadaun Xineza hela hodi halo hela prátika ba jogu ilísitu Scaming Call Center.
Iha Operasaun ne’e, Ekipa Konjuta tama uma referidu hodi asegura sidadaun estranjeiru na’in-hitu no halo apreensaun ba ekipamentu balun ne’ebé sidadaun sira ne’e uza hodi halo atividade ilísitu ne’e.
Sidadaun estranjeiru ne’ebé ekipa asegura ne’e sidaun Indonézia neen, kompostu husi feto tolu no mane tolu inklui sidadaun Xineza mane ida.
Tuir deklarasaun uma nain, David Menezes, katak uma ne’e sidadaun estranjeiru kazal ida maka mai aluga.
“Sira mak sosa kadeira meza, kama no instala internet starlink besik fulan ida ona maibe selu uluk fulan tolu nian no kada fulan sira selu osan ho montante $2.500”, David Menezes hateten iha Bedois domingu ne’e.
Hafoin ekipa asegura tiha sidaun na’in- hitu ne’e, ekipa lori kedan mai iha Diresaun Servisu Investigasaun Kriminál Komandu Jerál PNTL Kaikoli hodi submete ba prosesu identifikasaun.
Entertantu iha sesta (17/7) maizumenus tuku 13:00 Diresaun Servisu Investigasaun Kriminál (DSIK) lideradu husi Diretór DSIK Superintendente Xefe Polísia Joao Belo halo operasaun ba uma ida iha área Manleu Canosa nian, área Delta II no Bairru Pite, iha operasaun ne’e polísia lakonsege asegura suspeitu sira ba krime Scaming call Center tanba suspeitu sira desvia ka halai sees husi polísia molok loron rua antes.
Tanba suspeitu sira hatene informasaun antes loron rua liu ba, nune’e bainhira polísia ba sira-nia fatin sira desvia ona husi polísia sira-nia operasaun.
Maibé iha operasaun ne’e, Diresaun Servisu Investigasaun Kriminál konsege asegura objetu ba krime ita hanesan Laptop no destop boot ida ne’ebé sidadaun Xineza monta iha uma aluga ida iha área Canossa nia inklui rede starlik.
Tuir observsaun TATOLI iha terenu nota liga ho operasaun ne’ebé halo husi Diresaun Servisu Investigasaun Kriminál halo iha, sesta foin lalais, ba iha uma ida área Canossa nia katak suspeitu halo hela atividade ba prátika scaming call Center no rede starlik balun iha uma leten sira sobu no husik hela nia foun de’it, situasaun hanesan mós akontese ba iha uma aluga ida ne’ebé seidauk Xineza sira aluga iha Delta II, inklui iha Bairru Pite.
Notisia relevante:PM Xanana akompaña direta Autoridade Seguransa desmantela rede scam
Jornalista: Natalino Costa
Editor: Florencio Miranda Ximenes
