VIKEKE, 22 Jullu 2026 (TATOLI)—Vise-Ministru ba Fortalesimentu Institusionál Saúde (VMFIS), José dos Reis Magno, hateten Komemorasaun Loron Naionál Saúde ba da-XI (22 Jullu 2015-22 Jullu 2026) ne’e Governu kontinua aposta ba rekursu umanu no fó-atensaun ba fasilidade saúde sira hodi moderniza ekipamentu sira.
“Loron ohin ba komemorasaun ida-ne’e fó tempu ba ita hodi reflete no tempu hodi fó rekoñesimentu ba profisionál saúde sira, nune’e mós tempu ba ita hodi renova ita-nia kompromisiu servisu saúde ba povu Timor-Leste. Serimónia ne’e ita selebra ba ema sira-ne’ebé didika sira-nia moris tomak hodi asegura ema-nia saúde no salva ema seluk nia moris,” Vise Ministru ne’e hateten ba jornalista sira iha kampu futeból Vikeke, Kuarta ne’e.
Nune’e, ba selebrasaun ne’e, Governante ne’e reafirma, Ministériu Saúde (MS) hakarak harii sistema ida-ne’ebé forte, modernu, justu no besik liután ba povu.
Notísia relevante: Komemora Loron Nasionál Saúde, CCITL Vikeke apoiu prémiu ba MS
“Bainhira ita hadi’a saneamentu no promove moris saudavel ita investe diretamentu ba saúde povu nian. Saúde hahú husi uma, hahú husi bee-moos, hahú husi ai-han nutritivu, fó vasinasaun ba labarik sira, kuidadu inan isin-rua, ezersísiu fíziku no ema idaidak responsabiliza ba an atu hadi’a nia saúde rasik, ba família no komunidade,” nia subliña.
José haktuir durante tinan ida ikus ne’e Timor-Leste halo ona progresu iha setór saúde mak hanesan servisu kuidadu saúde primária, hadi’a programa vasinasaun no estabelese sistema vijilánsia epidemolójika, investe iha dijitalizasaun servisu saúde.
“Bainhira instituisaun forte mak garante servisu públiku ne’ebé efisiente, transparente no kualidade aas. Maski nune’e, ita sei hasoru dezafiu barak ita kontinua númeru profisionál saúde, ita presiza hadi’a disponiblidade ai-moruk, ekipamentu médiku no infraestutura saúde,” nia tenik.
Nia hakarak fó apresiasaun espesiál ba profisionál saúde sira-ne’ebé servisu iha área remota sira, maski hasoru difikuldade barak, maibé nafatin kontinua dedika an ba servisu atu povu bele asesu ba kuidadu saúde.
Iha fatin hanesan, Prezidente Autoridade Munisípiu (PAM) Vikeke, Francisco C. S. de Gonzaga Soares, haktuir presenza Ministériu Saúde nian iha Munisípiu Vikeke sai konfiansa ida husi Governu fó ba Munisípiu Vikeke.
“Durante ne’e ita-nia profisionál sira lahatene loron no lahatene kalan hodi serbí povu Timor Leste. Tan ne’e, ha’u hakarak hato’o agradesimentu ba Ministériu Saúde realiza serimónia Komemorasaun Loron Nasionál Saúde,” nia hato’o.
Entretantu, serimónia komemorasaun ne’e partisipa husi autoridade lokál, Komadante Polísia Nasionál Timor-Leste (PNTL), veteranu, CCITL, servisu saúde munisipál, komunidade no bainaka sira seluk.
Jornalista: Vitorino Lopes da Costa
Editór: Xisto Freitas da Piedade
