VIQUEQUE, 30 agostu 2024 (TATOLI)- Komunidade Postu Uatulari ne’ebé nu’udar votante iha konsulta popular 30 Agostu 1999, Filomena do Rosário, relembra, iha selebrasaun loron 30 Agostu 1999, halo sidadaun hotu hotu hanoin fali iha momentu votasaun ne’ebé nakonu ho ta’uk, maibé berani ba sentru votasaun hodi determina nia luta ba ukun-rasik aan.
“Iha momentu 30 agostu 1999, ami ba partisipa eleisaun iha sentru votasaun área Alembata iha suku Babullu. Maibé molok ami ba partisipa votasaun ami-nia sasan aruma hotu ona . Tanba tauk karik otonomia manán ita bele mate, se Konsellu Nasionál Timorense Rekonstrusaun (CNRT, sigla portugés) manán ita la mate, maibé ne’e mos ita tenke hala’i ba ai-laran tanba ta’uk pro-otonomia sira oho ita”, Filomeno do Rosário, hateten ba Agência Tatoli, iha resentu postu administrativu Uatulari, sesta (30/08).
Notísia relevante: Iha 30 agostu 1999 “Milísia-sira ameasa ami, maibé ami lata’uk ba vota nafatin”
Entaun iha fatin votasaun,” ami hada’u malu, sena malu de’it, oinsa mak hamrik iha oinsa atu vota uluk tiha hodi fila ba ami-nia uma, hodi bá kedam ai-laran. Nune’e iha momentu ne’ebá ami vota hahú tuku 8:00, depois vota hotu fila bá ami-nia uma Uatulari antigu ho vizinu sira ami halai ba ai-laran. Tanba ema ameasa ami atu oho ami”, nia konta.
Hafoin votasaun, Filomena dehan: “Ami sente timor manán ona funu ne’ebé iha konsulta populár, ami kontente tebes hakarak ba vota, ami organiza família sira ba partisipa vota hodi manán, maske husi ami-nia ho distásia dook kuaze kilometru haat resin. Ami bá tanba hakarak manán eleisuan”, nia afirma
Iha fatin hanesan, Joven Rezisténsia, suku Macadique, Armido Guterres, konta, momentu 30 agostu 1999 situasaun defisil, maibé rona husi lidersansa sira katak sei iha konsulta populár hodi determina Timor-Leste nia katak hakarak ba Ukun-rasik aan ou kontinua hamutuk ho Indonézia (Otonomia).
“Maske situasaun defisil, maibé ami garante katak mate ka moris timor tenlke ukun rasik-an. Nune’e ami la ta’uk bá ezerse ami-nia diretu iha loron 30 agostu 1999”, nia haktuir.
Iha sentru votasaun nia dehan, distánsia ba sentru votasaun kilométru ida, nune’e sai husi uma bá fatin votasaun preparadu hodi ezerse votu detemina destinu Timor-Leste ba ukun-rasik-an.
“Iha Uatulari momentu ne’ebá ameasa barak liu, maibé ami la ta’uk ba tuir votasaun, hafoin votasaun ami halai hotu ba ai-laran tanba tauk ema oho ami,”Nia konta.
Notísia relevante: SekJer ONU husu Governu TL presiza garante ba sidadaun hotu hetan moris di’ak
Jornalista : Vitorino Lopes da Costa
Editór : Florencio Miranda Ximenes
