BOBONARO, 29 agustu 2023 (TATOLI)-Sekretáriu Prezidente Konsellu Veteranu Munisipál Bobonaro, Lucio Dinis Marques, hateten, Konsulta Popular 30 agustu 1999 mak loke dalan ba independénsia, iha momentu ne’ebá ema hotu-hotu ta’uk, maibé barani vota ba ukun rasik-aan.
Nia haktuir, memória pasadu ne’e hanesan reflesaun ida hodi komemora loron Konsulta Popular 30 agostu ba dala 24 iha loron (30/09/2023) ne’e.
Notísia relevante: Konsulta Populár: Timoroan hamutuk prega metin “Ukun Rasik-Aan” ho “Pregu”
“Momentu ne’e situasaun trauma, ema hotu-hotu tauk, maibé barani ba vota, tanba loron ne’e duni mak ita hakarak independénsia, ita hotu-hotu tenke tuir vota iha fatin ne’ebé de’it, bainhira milisia sira tuir mós kontinua nafatin, mantein pozisaun mate ka moris ukun rasik-aan, hanean maun boot Nicolau Lobato hameno hela katak, hela labarik ida de’it mós ita-nia rai tenke ukun-aan,” veteranu ne’e informa ba Tatoli iha Maliana, tersa ne’e.
Nia lembra, momentu ne’ebá timor-oan sira ho espíritu voluntarizmu ba tuir votasaun ho prinsípiu ida katak, biar militár Indonézia tiru mate ba moos maibé Timor tenke hetan imdependénsia.
“sira ida ba sorin ne’e moos terus, ferik-katus sira aleija tuituir dalan, joven balu ema kaer lori ba halo lakon tiha, iha-ne’e moos hanesan milísia sira ataka ita-nia populasaun barak halai ba foho, balu ba fatin seluk tanba situasaun,” nia katak.
Tuir dokumentu istóriku ne’ebé Agência Tatoli sira hosi relatóriu Comissão de Acolhimento, Verdade e Reconciliação de Timor Leste (CAVR-TL) ho titulu “Chega!” ne’e haktuir katak, iha loron 30 agostu 1999 nu’udar lorom memória istóriku ida ba Timor-Leste, tanba maske hasoru intimidasaun no violasaun oioin, iha loron ida-ne’e povu iha territóriu Timor-Leste, Indonézia, Austrália no Portugál sai hosi uma nakonu ho esperansa hodi fó sira0nia votu ba opsaun atu hamutuk ho Indonézia ka haketak an hosi Indonézia.
Sentru votasaun ba Konsulta Populár (30 agostu 1999) hamutuk 200 mak estabelese iha territótiu Timor laran tomak. Totál populasaun ne’ebé rejistu atu vota hamutuk 451,792 no hosi totál populasaun ne’e, 98,5% ba mak vota iha sentru votasaun.
Notísia Relevante:Kampaña ikus ba konsulta populár, milísia oho joven rua iha sede CNRT Oé-Cusse
Jornalista: Sergio da Cruz
Editór: Cancio Ximenes
