VIKEKE, 17 Novembru 2025 (TATOLI)—Prezidente Asosiasaun Feto Munisípiu Vikeke, Luciana Guterres informa Asosiasaun Feto (AF) Munisípiu Vikeke sei luta maka’as buka fundu hodi kapasita feto sira kona-ba lideransa nian.
“Ohin loron ita haree iha Munisípiu Vikeke maioria mane mak donu kargu sira, maibé partisipasaun feto mínimu liu. Tan ne’e, ami sei esforsu buka fundu hodi fó kapasitasaun ba ami-nia feto maluk sira liuliu ba kapsitasaun lideransa nian,” Luciana Guterres dehan ba TATOLI iha Postu Administrativu Vikeke Vila, Munisípiu Vikeke, Segunda ne’e.
Prezidente AF hatutan, papél AF nian mak atu haforsa partisipasaun feto iha vida polítika, iha nivel foti desizaun no empodera feto sira iha vida ekonomia.
“Daudaun ne’e, ita seidauk iha fundu hodi kapasita ita-nia maluk feto sira to’o aldeia no suku sira, maibé ita sempre hato’o proposta ba parseiru sira, maibé la hetan apoiu. Tanba, antes ne’e, difikuldade ne’ebé ami hasoru mak asosiasaun seidauk rejistada iha notariadu, nune’e foin lalais tinan 2024 mak ami esforsu konsege rejista no hetan ona legalidade husi Ministériu Justisa. Ami hahú ona buka fundu, ne’ebé ami hatama ona ami-nia proposta ba parseiru sira,” nia haktuir.
Luciana tenik AF submente proposta ba doadór balun husi Austrália hodi husu apoiu fundu ba Asosiasaun Feto Munisípiu Vikeke no hetan ona aprovasaun maibé fundu ki’ik, $5.000, ne’ebé seidauk aloka ba konta bankária asosiasaun nian. Fundu ne’e atu apoia ba foin-sa’e sira iha setór agrikultura nian.
“Ba kapasitasaun nian ami sei esforsu buka fundu hodi kapasita ita-nia feto maluk sira iha Vikeke. Tanba ami hakarak períodu mai ne’e kada suku feto tenke kandidata aan ba xefe suku,” nia subliña.
Luciana haktuir, hahú 2002 to’o 2004, Administradór Munisípiu Vikeke feto ida, maibé agora feto laiha ona, entaun ligada partisipasaun laiha ekilíbriu.
Tuir nia nivel aldeia no suku hahú husi eleisaun suku períodu dahuluk feto asume kna’ar xefe aldeia no xefe suku laiha. Iha eleisuan suku ba daruak mak feto na’in rua asume kna’ar xefe suku iha Suku Afaloikai, Postu Uatukarbau no Suku Liaruka, Postu Ossú. Iha eleisaun datoluk xefe suku feto na’in-rua tun no xefe suku ida mak sa’e fali mak Xefe Suku Bibileo no xefe aldeia feto na’in-lima.
Enkuantu, iha tinan 2023-2030, eleisaun suku iha suku 38 iha Munisípiu Vikeke okupa husi maioria mane, feto laiha. Xefe aldeia mak okupa husi feto hamutuk na’in-11.
Jornalista: Vitorino Lopes da Costa
Editór: Xisto Freitas da Piedade
